ەكسكۋرسياعا 100-دەن استام ءجاسوسپىرىم قاتىستى.
رەسپۋبليكا كۇنى قارساڭىندا الماتى قالاسىنىڭ جاستارعا ارنالعان دەمالىس ورتالىقتارىنا كەلۋشىلەر تانىمال تۋريستىك ورىندار – شارىن شاتقالى مەن كولساي كولىنە باردى، دەپ حابارلايدى Almaty-akshamy.kz
تەگىن تۋردى الماتى قالاسىنىڭ جاستار ساياساتىن دامىتۋ مەملەكەتتىك قورى حالىقتىڭ الەۋمەتتىك وسال توپتارى ساناتىنا جاتاتىن وتباسىلارداعى جاسوسپىرىمدەرگە (ءسوسق) ۇيىمداستىردى.
بۇل بيىلعى بەسىنشى تۋر بولدى. 2022 جىلى جاسوسپىرىمدەر ىقىلاس اتىنداعى (21، 22، 26 شىلدە) حالىق مۋزىكالىق اسپاپتارى مۇراجايىنا، ەسىك كولىنە (8 قازان)، تۇرگەن شاتقالىنا (9 قازان)، كوشپەندىلەر قالاسىنا (15 قازان)، شارىن شاتقالى مەن كولساي كولىنە (16 قازان) باردى. ءبىر كۇندىك تۋرعا كولىك، تاماقتانۋ جانە گيد قىزمەتتەرى كىرەدى.
ەلىمىزدىڭ باستى كورىكتى جەرلەرىمەن جانە تۋريستىك ورىندارىمەن تانىستىرۋ تۇراقتى نەگىزدە جۇزەگە اسىرىلادى جانە الەۋمەتتىك وسال توپتار ساناتىنداعى وتباسىلارعا ارنالعان قالالىق دەمالىس ورتالىقتارىندا تاربيەلەنۋشى 12 مەن 29 جاس ارالىعىنداعى جاسوسپىرىمدەر مەن جاستار ءۇشىن تەگىن. كەلەسى جىلى دا 5 ەكسكۋرسيالىق تۋر وتكىزۋ جوسپارلانۋدا.
سونىمەن قاتار، تۋريستىك قىزمەتپەن اينالىساتىن «رومانتيك» دەمالىس ورتالىعىنا بارعان جاسوسپىرىمدەر تۋريزم جانە قاۋىپسىزدىك نەگىزدەرىن، تاكتيكالىق ويىنداردى، كارتوگرافيانى مەڭگەرەدى، تۋريستىك سپورتتىق ساياحاتتارعا شىعادى.
الماتىدا مەگاپوليستىڭ بارلىق سەگىز اۋدانىندا بارلىعى 150-گە جۋىق دەمالىس ورتالىعى بار. بۇل جوبا الەۋمەتتىك سيپاتقا يە جانە حالىقتىڭ الەۋمەتتىك وسال توپتارىنداعى بالالارعا، جاسوسپىرىمدەرگە جانە جاستارعا كومەك كورسەتۋگە باعىتتالعان.
وقىتۋ ءار ءتۇرلى باعىتتا تەگىن جۇرگىزىلەدى: مادەني-اعارتۋ، اسكەري-پاتريوتتىق، سپورتتىق، شىعارماشىلىق، ينتەللەكتۋالدىق، روبوتوتەحنيكا جانە ت.ب.
دەمالىس ورتالىقتارىندا شەبەرلىك سىنىپتارى، بايقاۋلار، تۋرنيرلەر، جارىستار، ەستافەتالار، تاربيە ساعاتتارى، پروفيلاكتيكالىق اڭگىمەلەر، كەزدەسۋلەر، كورمەلەر، ەكسكۋرسيالار، ساياحاتتار مەن اكسيالار تۇرىندە ءارتۇرلى فورماتتاعى ءىس-شارالار وتكىزىلەدى.
جوبا اياسىندا دەمالىس ورتالىقتارىندا 500 ۇيىرمە مەن سەكسيا اشىلىپ، 155 000-نان استام ادام قامتىلعان.