الماتىدا تۇتىنۋشىلار قۇقىعىنا قاتىستى ءجيى ورىن الاتىن بۇزۋشىلىقتار اتالدى
«ۇلتتىق تۇتىنۋشىلار ليگاسى» رەسپۋبليكالىق قوعامدىق بىرلەستىگىنىڭ پرەزيدەنتى سۆەتلانا رومانوۆسكايا الماتى قالاسىنىڭ وڭىرلىك كوممۋنيكاسيالار قىزمەتىنىڭ بريفينگىندە ساتۋشىلار تۇتىنۋشىلاردى قالاي الداپ-اربايتىنىن ايتتى، دەپ حابارلايدى اlmaty-akshamy.kz.
كەڭ تارالعان قۇقىق بۇزۋشىلىقتار تىزىمىنە قىزمەت كورسەتۋ، جۇمىستاردى ورىنداۋ جانە مەرزىمدەر تۋرالى شارتتىڭ ورىندالماۋى كىردى. مىسالى، تاپسىرىس بەرىلگەن جيھازدى ۋاقىتىندا بەرمەيدى نەمەسە جوندەۋ جۇمىستارىن اياقتامايدى.
سۆەتلانا رومانوۆسكايا وتكەن جىلدىڭ 9 ايىندا ەلىمىزدىڭ ون وڭىرىندە جوو بازاسىندا جۇمىس ىستەپ تۇرعان «تۇتىنۋشىلاردىڭ ۇلتتىق ليگاسى» 9 954 ساتىپ الۋشىعا 2 458 379 537 تەڭگەنى قايتارۋعا كومەكتەسكەنىن جەتكىزدى.
ليگاعا ستۋدەنتتەر، ولاردىڭ اتا-انالارى مەن وقىتۋشىلاردان قۇرالعان 78 مىڭ ادام كىرەدى. ولار نەگىزىنەن تۇتىنۋشىلارعا كومەك كورسەتەدى.
«تۇتىنۋشىلاردىڭ باسىم كوپشىلىگى ۇيالى بايلانىس قىزمەتتەرىنە، ينتەرنەتتىڭ ساپاسىنا، وپەراتورلار ازاماتتارعا تاريفتەردى وزگەرتەتىنىن ەسكەرتپەي، ءبىرجاقتى شەشىم قابىلداناتىنىنا جانە وزگەرىستەر جايىندا ادامدار مۇلدەم حابارسىزدىعىنا، تۇتىنۋشىلارعا قاجەت ەمەس قىزمەتتى كۇشتەپ ۇسىناتىنىنا شاعىمدانادى. «تۇتىنۋشىلاردىڭ قۇقىقتارىن قورعاۋ تۋرالى» زاڭنىڭ 24-بابى بويىنشا، ازاماتتاردىڭ ءوز ەركىمەن تاڭداۋعا مۇمكىندىگى بار، ەشكىم ولارعا قاجەت ەمەس نارسەنى تاڭۋعا قۇقىلى ەمەس»، - دەيدى سۆەتلانا رومانوۆسكايا.
«ۇلتتىق تۇتىنۋشىلار ليگاسىندا» ساتىپ الۋشىلارعا تەحنيكالىق سيپاتتاعى قىزمەتتەردى ۇسىنعان كەزدە اۆتوموبيلدەردى ساتۋعا قاتىستى ماسەلەلەر كوتەرىلەدى. ياعني، ەگەر ساتىپ الىنعان كولىكتىڭ يەسى وسى اۆتوسالوندا مايدى تەكسەرمەسە جانە اۋىستىرماسا، وندا وعان بۇل كولىككە كەپىلدىك بەرىلمەيدى. بۇل شىن مانىندە ادامدى جاڭىلىستىرۋ.
«كوپتەگەن ادامدار بىلمەيدى. ماسەلەن، ەگەر دە تاپسىرىس بەرىلگەن جيھازدى ۋاقتىلى جەتكىزبەگەن بولسا، وندا جەتكىزۋ مەرزىمى اياقتالعان كەزدەن باستاپ تۇتىنۋشى تولەگەن قۇننان كەشىكتىرىلگەن ءار كۇن ءۇشىن 1% ءوسىمپۇل الۋعا قۇقىلى. ەگەر ءبىر جىل بويى وسى جيھازدى جەتكىزبەسە، وندا ساتۋشى 300% - دان استام ءوسىمپۇل تولەۋى كەرەك جانە بۇل ونى كەلىسىلگەن كەزدەگى ونىڭ ساپاسى مەن جاۋاپكەرشىلىگىنەن بوساتپايدى»، - دەيدى رومانوۆسكايا.
ءوزىڭىزدى جوسىقسىز ساتۋشىلاردان قورعاۋ ءۇشىن كەلىسىمشارتتى دۇرىس جاساۋ وتە ماڭىزدى. مىسالى، وندا ءونىم جاسالاتىن ماتەريالدىڭ ارتيكۋلىن جازىپ، ينتەرنەتتەگى پىكىرلەردى زەرتتەۋ كەرەك.