اعىمداعى جىلدىڭ 23 قازانىندا اگەنتتىك ءتوراعاسى ا.ج. ءجۇماعاليدىڭ باسشىلىعىمەن جول سالاسىنداعى جەمقورلىق تاۋەكەلدەرىن جويۋ ماسەلەلەرى بويىنشا ۆەدومستۆوارالىق كەڭەس ءوتتى.
ءىس-شاراعا كولىك ءمينيسترى م.ك. قارابايەۆ، جوعارى اۋديتورلىق پالاتانىڭ، ستراتەگيالىق جوسپارلاۋ، باسەكەلەستىكتى قورعاۋ جانە دامىتۋ اگەنتتىكتەرىنىڭ، قارجى، ونەركاسىپ جانە سيفرلاندىرۋ مينيسترلىكتەرىنىڭ، «اتامەكەن» ۇكپ، سونداي-اق جەرگىلىكتى اتقارۋشى ورگانداردىڭ وكىلدەرى قاتىستى، دەپ حابارلايدى aqshamnews.kz.
كەڭەستە مەملەكەت باسشىسىنىڭ تاپسىرماسى بويىنشا اگەنتتىك كولىك مينيسترلىگىمەن بىرلەسىپ وتكىزگەن جەمقورلىق تاۋەكەلدەرىنە سىرتقى تالداۋ ناتيجەلەرى تالقىلاندى.
ماسەلەن، سوڭعى 5 جىلدا جول سالاسىنا 6 ترلن تەڭگەدەن استام قاراجات جۇمسالدى، ءبىراق جول جەلىسىنىڭ جاي-كۇيى حالىق تاراپىنان شاعىم تۋدىرۋدا.
2023-2024 جىلدارى مەملەكەتتىك ورگاندارعا اۆتوموبيل جولدارىنىڭ ساپاسىزدىعىنا قاتىستى 20 مىڭنان استام شاعىم ءتۇستى. جۇرتشىلىق مۇنى جەمقورلىقپەن بايلانىستىرادى.
وسى جىلدىڭ باسىنان بەرى عانا اگەنتتىك وسى سالادا 24 قىلمىستىق ءىستى تىركەگەن. سىرتقى تالداۋ جوسپارلاۋدان باستاپ باقىلاۋ مەن كۇتىپ ۇستاۋعا دەيىنگى جول قۇرىلىسى مەن جوندەۋدىڭ بارلىق كەزەڭدەرىندە جۇيەلى جەمقورلىق تاۋەكەلدەرىنىڭ بار ەكەندىگىن كورسەتتى.
باستاپقى كەزەڭدە پروبلەمالىق ۋچاسكەلەر دۇرىس انىقتالمايدى، جاقىندا سالىنعان جولدارعا جوندەۋ جۇمىستارى جۇرگىزىلەدى. جوبالاۋ كەزىندە سمەتا شامادان تىس جۇمىس پەن ماتەريالداردىڭ ەسەبىنەن جاساندى تۇردە جوعارىلاتىلادى. كەلىسىمشارتتار كوبىنەسە تاجىريبەسى مەن رەسۋرستارى جوق مەردىگەرلەرمەن، ءبىر كوزدەن نەمەسە كارتەلدىك كەلىسىم شارتتارىمەن جاسالادى.
قوسالقى مەردىگەرلىك ۇيىمداردى تارتۋ ەشكىمنىڭ باقىلاۋىندا ەمەس. ول ءوزىنىڭ جەتكىلىكسىزدىگىن جانە كوپ ساتىلى باقىلاۋ جۇيەسىن كورسەتتى. جول اكتيۆتەرىنىڭ ۇلتتىق ساپا ورتالىعىنىڭ انىقتالعان اقاۋلار تۋرالى قورىتىندىلارىن ورىنداۋ مىندەتتى ەمەس، ال تەحنيكالىق قاداعالاۋ ءوز فۋنكسيالارىن رەسمي تۇردە ورىندايدى.
سالانى دامىتۋ ءۇشىن قازاقستاندىق جول عىلىمي-زەرتتەۋ ينستيتۋتىنىڭ الەۋەتى تولىق كولەمدە پايدالانىلمايدى. قولدانبالى عىلىمي زەرتتەۋلەر مەن يننوۆاسيالاردى ەنگىزۋدىڭ ورنىنا ينستيتۋت نورماتيۆتىك قۇجاتتامانى ازىرلەۋمەن اينالىسادى. جاڭا تەحنولوگيالاردى ەنگىزۋدى باقىلاۋدىڭ بولماۋى، بىلىكتى كادرلاردىڭ جەتىسپەۋشىلىگى جانە كۇردەلى نورماتيۆتىك-قۇقىقتىق بازا دا اۆتوجولداردىڭ ساپاسىنا اسەر ەتەدى. سيفرلاندىرۋدىڭ جەتكىلىكسىزدىگى پروبلەمانى ودان ءارى ۋشىقتىرادى.
سوڭعى 10 جىلدا اقپاراتتىق جۇيەلەردى دامىتۋعا 16 ملرد بيۋدجەت قاراجاتى جۇمسالدى. دەگەنمەن، جولداردىڭ سيفرلىق كارتاسى ءالى ازىرلەنبەگەن. تالداۋ قورىتىندىسى بويىنشا اگەنتتىك وسى سالاداعى جەمقورلىق تاۋەكەلدەرىن جويۋ بويىنشا 90-نان استام ۇسىنىس دايىندادى.
جوبالار ساراپتاماسىنىڭ جانە تەحنيكالىق قاداعالاۋ ينستيتۋتىنىڭ فۋنكسيونالىن قايتا قاراۋ، قازجولعزي - سۇرانىسقا يە يننوۆاسيالىق تەحنولوگيالاردى ازىرلەۋگە قايتا باعدارلاۋ، ءىرى جول جوبالارىن عىلىمي-تەحنيكالىق سۇيەمەلدەۋ، جول اكتيۆتەرى ساپاسىنىڭ ۇلتتىق ورتالىعىنىڭ وكىلەتتىكتەرىن كۇشەيتۋ، سونداي-اق جولداردىڭ سيفرلىق كارتاسىن جاساۋ جونىندە شارالار ۇسىنىلدى. ءبىرقاتار ۇسىنىستار ءقازىردىڭ وزىندە سىنالۋدا. مىسالى، اتىراۋ وبلىسىندا اۆتوجولداردىڭ ءبىرىن ورتاشا جوندەۋ كەزىندە «سيفرلىق تەڭگە» جوباسى ارقىلى بولىنگەن اقشالاي قاراجاتتى قاداعالاۋ جوسپارلانۋدا. جول سالاسىنداعى سىبايلاس جەمقورلىق تاۋەكەلدەرىن جويۋ جانە ۇسىنىمداردى ورىنداۋ بويىنشا جۇمىس جالعاسۋدا.