2025 جىلدىڭ ون ايىندا ازاماتتىق اۆياسيا كوميتەتىنىڭ قىزمەتى سالانى تۇراقتى دامىتۋعا، ۇشۋ قاۋىپسىزدىگى دەڭگەيىن ارتتىرۋعا جانە ازاماتتىق اۆياسيا سالاسىنداعى مەملەكەتتىك رەتتەۋ جۇيەسىن جەتىلدىرۋگە باعىتتالدى، - دەپ حابارلايدى Aqshamnews.kz.
2025 جىلدىڭ ون ايىندا اۋە كولىگىمەن 26،6 ملن جولاۋشىعا قىزمەت كورسەتىلدى، بۇل 2024 جىلعى كەزەڭىمەن سالىستىرعاندا 8%-عا ارتتى. ونىڭ ىشىندە 13،1 ملن جولاۋشى وتاندىق اۋە كومپانيالارىمەن تاسىمالداندى، بۇل وتكەن جىلدىڭ وسى كەزەڭىمەن سالىستىرعاندا 6،1%-عا كوبەيدى.
سونىمەن قاتار، ەسەپتىك كەزەڭدە اۋەجايلاردا وڭدەلگەن جۇك كولەمى 140 مىڭ تونناعا جەتتى، ونىڭ ىشىندە وتاندىق اۋە كومپانيالارى تاسىمالداعان جۇك كولەمى 23،8 مىڭ توننانى قۇرادى، بۇل 2024 جىلدىڭ سايكەس كەزەڭىمەن سالىستىرعاندا 6،3%-عا ارتىق.
ىشكى اۋە باعىتتارىنىڭ سانى 60 باعىتتى قۇراپ، اپتاسىنا 821 رەيس جيىلىگىمەن ورىندالدى.
حالىقارالىق مارشرۋتتىق جەلى 30 ەلدى قامتيتىن 131 باعىتقا دەيىن كەڭەيتىلىپ، اپتاسىنا جالپى 616 رەيس ورىندالدى.
2025 جىلدىڭ شىلدە ايىندا قازاقستان رەسپۋبليكاسىنا حالىقارالىق ازاماتتىق اۆياسيا ۇيىمى (يكاو) كەڭەسىنىڭ پرەزيدەنتى سالۆاتورە شاككيتانونىڭ رەسمي ساپارمەن كەلدى. بۇل ساپار يكاو كەڭەسى پرەزيدەنتىنىڭ قازاقستانعا جاساعان تاريحتاعى العاشقى رەسمي ساپارى بولدى.
اعىمداعى جىلدىڭ 2–14 قىركۇيەك ارالىعىندا قازاقستان رەسپۋبليكاسىنىڭ اۋماعىندا اۆياسيالىق قاۋىپسىزدىك ماسەلەلەرى بويىنشا يكاو ءاۋديتى جۇرگىزىلدى.
تەكسەرۋ قورىتىندىسى بويىنشا يكاو حالىقارالىق ستاندارتتارىنا سايكەستىك دەڭگەيى 95،7%-دى قۇرادى، بۇل الەمدىك ورتاشا كورسەتكىشتەن (72%) جانە ورتاەۋروپالىق دەڭگەيدەن (88%) ايتارلىقتاي جوعارى. قازاقستاننىڭ كورسەتكىشى تمد ەلدەرى اراسىندا عانا ەمەس، يكاو-نىڭ ەۋروازيالىق وڭىرىندە دە ەڭ جوعارى كورسەتكىشتەردىڭ ءبىرى (گرۋزيا – 89،75%، وزبەكستان – 85،47%، بەلارۋس – 91،85%، قىرعىزستان – 85،7%، ازەربايجان – 74،66%، البانيا – 68،74%، تۇركيا – 77،59%).
مەملەكەت باسشىسىنىڭ اقش-قا جاساعان ساپارى اياسىندا «Air Astana» اۋە كومپانياسى مەن Boeing كومپانياسى اراسىندا بۇرىن تاپسىرىس بەرىلگەن ءۇش اۋە كەمەسىنە قوسىمشا 15 Boeing 787–9 Dreamliner ۇشاعىن جەتكىزۋ تۋرالى كەلىسىمشارتقا قول قويىلدى. 18 Boeing 787–9 اۋە كەمەسىنەن تۇراتىن اۋە پاركىنىڭ جالپى قۇنى 7 ملرد اقش دوللارىن قۇرايدى.
اۋە پاركىنىڭ تولىقتىرىلۋى قازاقستانعا حالىقارالىق مارشرۋتتاردىڭ گەوگرافياسىن كەڭەيتۋگە، ونىڭ ىشىندە اقش-قا تىكەلەي رەيستەر اشۋعا مۇمكىندىك بەرەدى.
2025 جىلعى 21 شىلدەدە ق ر كولىك مينيسترلىگىنىڭ №223 بۇيرىعىمەن اۆياسيالىق تەحنيكا جانە (نەمەسە) ارنايى كولىك ليزينگى شارتتارى اياسىندا جۇزەگە اسىرىلاتىن كۇردەلى شىعىستاردىڭ قۇنىن جانە نىساناسىن ايقىنداۋ قاعيدالارى قابىلداندى. بۇل قاعيدالار مەملەكەتتىك قاتىسۋى بار اۋەجايلار ءۇشىن ارنايى تەحنيكانى ساتىپ الۋعا مۇمكىندىك بەرەدى.
وتاندىق اۋەكومپانيالارىنىڭ اۋە كەمەلەرى پاركى 12 جاڭا ۇشاقپەن تولىقتىرىلدى (SCAT – 4 Boeing 737 MAX8، Air Astana – 3 Airbus A321/320، FlyArystan – 5 Airbus A321/320).
2025 جىلعى 4 ماۋسىمداعى №412 ۇكىمەت قاۋلىسىمەن قازاقستان رەسپۋبليكاسىنىڭ 2025–2031 جىلدارعا ارنالعان ازاماتتىق پيلوتسىز اۆياسيانى دامىتۋ تۇجىرىمداماسى قابىلداندى. اتالعان قۇجاتتا رەتتەۋ، كادر دايارلاۋ جانە عىلىمي زەرتتەۋلەردى قوسا العاندا، دامۋدىڭ ستراتەگيالىق باعىتتارى ايقىندالعان.
اقتاۋ قالاسى اۋەجايىنىڭ ۇشۋ-قونۋ جولاعى مەن رولدەۋ جولىنىڭ كۇردەلى جوندەۋ جۇمىستارى، سونداي-اق استانا قالاسى اۋەجايىنىڭ ۇشۋ-قونۋ جولاعىنا اعىمداعى جوندەۋ جۇمىستارى اياقتالدى. سونىمەن قاتار بالقاش قالاسى اۋەجايى تەرمينالىنىڭ رەكونسترۋكسياسى اياقتالۋ ساتىسىندا.
كاتون-قاراعاي، زايسان جانە كەندىرلى كۋرورتتىق ايماقتارىندا ءۇش اۋەجايدىڭ قۇرىلىسى جۇرگىزىلۋدە، سونداي-اق ارقالىق قالاسى اۋەجايىنىڭ قىزمەتىن قالپىنا كەلتىرۋ بويىنشا جۇمىستار اتقارىلۋدا. بۇدان بولەك، پاۆلودار قالاسى اۋەجايىنىڭ اەرودرومىن رەكونسترۋكسيالاۋ بويىنشا جۇمىستار جۇرگىزىلۋدە.
سونىمەن قاتار، مەملەكەت باسشىسى دەڭگەيىندە ازاماتتىق اۆياسيانى دامىتۋ ماسەلەلەرى بويىنشا وتكەن كەڭەسىندە نەگىزگى تاسىلدەر ايقىندالىپ، ستراتەگيالىق شەشىمدەر قابىلداندى جانە سالانىڭ ودان ءارى دامۋىنا باعىتتالعان ورتا مەرزىمدى مىندەتتەر بەلگىلەندى.