2026 جىلعا دەيىن اۋىلدىق جەرلەردە زاماناۋي تالاپتارعا ساي 183 مەكتەپ سالىنادى. بۇل جايىندا ءماجىلىس دەپۋتاتتارىنىڭ ساۋالىنا پرەمەر-مينيستر ءاليحان سمايىلوۆتىڭ جاۋابىندا ايتىلعان، دەپ حابارلايدى قازاقپارات ءتىلشىسى.
«وقۋ-اعارتۋ مينيسترلىگى جەرگىلىكتى اتقارۋشى ورگاندارمەن بىرلەسىپ، تۇرعىلىقتى جەرىنە قاراماستان ورتا ءبىلىمنىڭ قولجەتىمدىلىگىن قامتاماسىز ەتۋ ماقساتىندا ءبىرقاتار كەشەندى ءىس-شارالاردى ىسكە اسىرۋدا. ءبىلىم بەرۋ ۇيىمدارىن جەتكىلىكتى قارجىلاندىرۋدى قامتاماسىز ەتۋ ءۇشىن اۋىل مەكتەپتەرىن جان باسىنا شاققانداعى قارجىلاندىرۋعا كەزەڭ-كەزەڭىمەن كوشىرۋ 2025 جىلى تولىق جۇزەگە اسىرىلادى. اۋىلدىق جەرلەرگە جوعارى بىلىكتى پەداگوگتەردى تارتۋ ماقساتىندا مۇعالىمدەر تاپشى وڭىرلەر ءۇشىن ءتيىستى قولداۋ ءىس-شارالارى توپتاماسىمەن ۇزدىك پەداگوگتەردى تارتۋ جونىندەگى ارنايى باعدارلاما ىسكە اسىرىلۋدا. بۇل باعدارلاما بىلىكتى جانە ىنتالى پەداگوگتەردى تارتۋ جانە قالدىرۋ ارقىلى ءبىلىم بەرۋ ساپاسىن جاقسارتۋعا باعىتتالعان»، - دەپ اتاپ وتەدى ۇكىمەت باسشىسى جاۋابىندا.
سونداي-اق ءا.سمايىلوۆ 2025 جىلعا دەيىن شاعىن قالالاردا، اۋدان ورتالىقتارىندا جانە اۋىلداردا 5 مىڭ مەكتەپ جاڭعىرتىلاتىندىعىن اتاپ وتەدى.
«بۇدان باسقا، «جايلى مەكتەپ» پيلوتتىق ۇلتتىق جوباسى اياسىندا 2026 جىلعا دەيىن اۋىلدىق جەرلەردە زاماناۋي تالاپتار مەن ءبىرىڭعاي ستاندارتتار بويىنشا 183 مەكتەپ سالىنادى. 2022 جىلعى شىلدە ايىنان باستاپ، «قازاقستان حالقىنا» قوعامدىق قورى، «نازاربايەۆ زياتكەرلىك مەكتەپتەرى» دببۇ جانە «ءبىلىم بەرۋدى تۇراقتى دامىتۋ قورى» قوعامدىق قورى بىرلەسىپ، «اۋىلدىق جەرلەردە تىرەك مەكتەپتەردىڭ الەۋەتىن دامىتۋ» جوباسىن ىسكە اسىرۋدا. بۇل جوبانىڭ باستى ماقساتى – اۋىل بالالارىنا ساپالى ءبىلىم الۋعا، ال مۇعالىمدەر ءۇشىن كاسىبي قۇزىرەتتىلىك دەڭگەيىن ارتتىرۋعا تەڭ مۇمكىندىكتەر بەرۋ»، - دەدى پرەمەر-مينيستر.