مەديسينا مەكەمەلەرىنىڭ جارتىسىنان كوبى توزىعى جەتكەن.
دەنساۋلىق ساقتاۋ ءمينيسترى اجار عينيات 2023 جىلى اۋىلداردا قانشا فەلدشەرلىك پۋنكت، فەلدشەرلىك-اكۋشەرلىك پۋنكت (فاپ) جانە دارىگەرلىك امبۋلاتوريا سالىناتىنىن ايتتى، دەپ حابارلايدى Almaty-akshamy.kz.
دەنساۋلىق ساقتاۋ ءمينيسترى ۇكىمەتتىڭ «اۋىلداعى دەنساۋلىق ساقتاۋ سالاسىن جاڭعىرتۋ» ۇلتتىق جوباسىن ماقۇلداعانىن ەسكە سالدى.
«ۇلتتىق جوبا اياسىندا 2023 جىلى 309 مساك نىسانىنىڭ قۇرىلىسى قاراستىرىلادى. ونىڭ ىشىندە 131 فەلدشەرلىك پۋنكت، 99 فاپ، 79 دارىگەرلىك امبۋلاتوريا سالىنادى. سونىمەن قاتار 11 ورتالىق اۋداندىق اۋرۋحاناعا كۇردەلى جوندەۋ جاسالىپ، جاڭارتىلادى. وندا قالالارعا بارماي-اق، «التىن ساعات» قاعيداتىن ساقتاي وتىرىپ، ينفاركت، ينسۋلت، جاراقات جانە باسقا دا جاعدايلاردا جەدەل مامانداندىرىلعان جانە جوعارى تەحنولوگيالىق مەديسينا كومەگىن بەرە الاتىن، سونىڭ ىشىندە تەلەمەديسينا جانە قاشىقتاعى مەديسينالىق قىزمەتتەر ارقىلى ەمدەي الاتىن مۇمكىندىكتەر قاراستىرىلادى»، - دەدى اجار عينيات.
ونىڭ ايتۋىنشا، ۇلتتىق جوبا اياسىندا دەنساۋلىق ساقتاۋ ۇيىمدارىن 575 زاماناۋي مەديسينا قۇرال-جابدىقتارىمەن قامتاماسىز ەتۋ قاراستىرىلعان. سونىمەن قاتار 2023 جىلى 307 مەديسينا قىزمەتكەرى وقىتىلادى. ونىڭ 54ء-ى - جالپى تاجىريبە دارىگەرى، 253ء-ى - ورتا مەديسينا قىزمەتكەرلەرى.
دەنساۋلىق ساقتاۋ مينيسترلىگىنىڭ مالىمەتىنشە، اۋىل تۇرعىندارىن پروفيلاكتيكالىق تەكسەرۋلەر بيىل دا جالعاسىپ، 3،2 ميلليون ادام قامتىلادى. شالعايداعى اۋىلداردىڭ تۇرعىندارىنا جىلجىمالى مەديسينا كەشەندەرى ارقىلى قىزمەت كورسەتۋ 1،5 ميلليون ادامدى قامتيدى. جالپى 2،4 ميلليوننان استام اۋىل تۇرعىنى قوسىمشا مامانداندىرىلعان مەديسينا كومەگىن الادى.
2022 جىلدىڭ 22 قاراشاسىندا اجار عينيات ۇكىمەت وتىرىسىندا قازاقستان اۋىلدارىنداعى مەديسينا مەكەمەلەرىنىڭ جارتىسىنان كوبى توزىعى جەتكەنىن ايتتى.