قازاقستان رەسپۋبليكاسىنىڭ پرەزيدەنتتىگىنە كانديدات جيگۋلي دايرابايەۆ ۇگىت-ناسيحات جۇمىستارىن باتىس قازاقستان وبلىسىندا جالعاستىرۋدا. وڭىرگە ارنايى كەلگەن كانديدات جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىندە كەزدەسۋ وتكىزدى. جيىنعا ۋنيۆەرسەتتىڭ باسشىلارى مەن وقىتۋشۋىلىق قۇرامى، ستۋدەنتتەر، جوو بەلسەندىلەرى قاتىستى. كەزدەسۋ بارىسىندا وقۋ ورداسىندا ءبىلىم العان مامانداردىڭ جۇمىسپەن قامتاماسىز ەتىلۋى تالقىعا سالىندى.
«ءيا، راسىندا اۋىلدىق جەرلەر مەن قالانىڭ دامۋ دەڭگەيىندە ايىرماشىلىق بارى جاسىرىن ەمەس. وسىنى انىق اڭعارىپ، كورىپ جۇرگەن جاستار وقۋ بىتىرگەن بويدا الدىمەن قالادا قىزمەتىن باستاپ، سول جەردە تۇراقتاپ قالۋدى كوزدەيدى. ءبىراق ءوزىمىز ايتقانداي، اۋىلداردى دامىتۋ مەملەكەتتىڭ باستى باعىتتارىنىڭ بىرىنە اينالىپ وتىر. وسى رەتتە «ديپلوممەن – اۋىلعا!» باعدارلاماسىنا وزگەرىستەر ەنگىزۋ قاجەت دەپ سانايمىن»، – دەپ اتاپ ءوتتى جيگۋلي دايرابايەۆ.
كانديدات اۋىلدان شىققان جاستار قايتا اۋىلعا ورالىپ، ءوز تۋعان جەرىنىڭ دامۋىنا ۇلەس قوسۋى قاجەت دەيدى. ول ءۇشىن ولارعا بارلىق جاعداي جاسالۋى ءتيىس. اۋىلدىق ەلدى مەكەندەردەگى بىلىكتى مامان تاپشىلىعىنىڭ ورنىن تولتىرۋدىڭ بىردەن-بىر جولى وسى. «ديپلوممەن – اۋىلعا!» باعدارلاماسىنىڭ اياسىن كەڭەيتىپ، جۇمىستى جاڭا دەڭگەيدە جالعاستىرعان ءجون.
«ەلىمىزدەگى اۋىل شارۋاشىلىعى باعىتىنداعى ۋنيۆەرسيتەتتەردىڭ تۇلەكتەرى نەگە ماماندىق بويىنشا جۇمىس ىستەۋگە بارمايدى؟ بىرىنشىدەن، سالاداعى جالاقىنىڭ تومەندىگىنە بايلانىستى. ەكىنشىدەن، اۋىلداعى تۇرمىستىق جاعدايدىڭ قيىندىعى، كوپتەگەن اۋىلداردا قاراپايىم سۋىق سۋ، ينتەرنەت جوق، جولدار وتە ناشار. ۇشىنشىدەن، بالالارعا ارنالعان دامىتۋ ورتالىقتارىنىڭ جوقتىعى. سوندىقتان «اۋىل» پارتياسى ۇسىنىپ وتىرعانداي، اۋىل جانە اۋىل شارۋاشىلىعى ماسەلەلەرىن بىرلەسىپ شەشۋ قاجەت»، – دەگەن پىكىردە جيگۋلي دايرابايەۆ.
قانديدات جيگۋلي دايرابايەۆ «جايىق ەت» كاسىپورنىنا بارىپ، ەڭبەك ۇجىمىمەن كەزدەستى. بۇگىندە زاماناۋي ەت وڭدەۋ كەشەنى 8 مىڭ توننا ءونىم شىعارادى. كاسىپورىن ءوندىرىس كولەمىن ارتتىرۋعا نيەتتى. الايدا زاۋىت باسشىلىعىنىڭ ايتۋىنشا، نەسيە الۋ بويىنشا قيىندىقتار تۋىنداپ وتىر.
وسى رەتتە جيگۋلي دايرابايەۆ اگروبيزنەس قۇرعىسى جانە اگرارلىق سالانى نىعايتقىسى كەلەتىندەر ءۇشىن پايىزسىز نەسيە بەرەتىن ارنايى اگروبانك قۇرۋدى ۇسىنعانىن اتاپ ءوتتى.
«پايىزسىز نەسيە قوجالىقتار مەن فەرمەرلىك شارۋاشىلىقتارعا، جەكە كاسىپكەرلەرگە، اۋىل شارۋاشىلىعى وندىرىستىك كووپەراتيۆتەرىن اشۋ مەن جەكە بيزنەستى كەڭەيتۋگە بەرىلۋى ءتيىس. مەن بۇل وزەكتى ماسەلەگە ءوزىمنىڭ سايلاۋالدى باعدارلامامدا دا توقتالدىم. ءبىز اۋىل شارۋاشىلىعى سالاسىن دامىتۋعا نيەتتى بولساق، وسى باعىتتا ەڭبەك ەتىپ جۇرگەن ازاماتتارىمىزدى قولداۋىمىز كەرەك»، – دەدى جيگۋلي دايرابايەۆ.