اۋىل شارۋاشىلىعىن دامىتۋعا ارنالعان شارالار تالقىلاندى

پرەزيدەنتتىككە كانديدات قاسىم-جومارت توقايەۆتىڭ رەسپۋبليكالىق قوعامدىق شتابىنىڭ مۇشەلەرى سولتۇستىك قازاقستان وبلىسىنىڭ تۇرعىندارىمەن ءبىرقاتار كەزدەسۋ وتكىزدى.
شتاب مۇشەلەرى «پەتەرفەلد اگرو» ءوندىرىس بازاسىندا سولتۇستىكقازاقستاندىق شارۋالارمەن جانە اۋىلشارۋاشىلىق تاۋارلارىن وندىرۋشىلەرمەن كەزدەستى. ءىس-شارا بارىسىندا الداعى جەتى جىلدا اۋىل شارۋاشىلىعىن دامىتۋعا ارنالعان شارالار تالقىلاندى.
«سوڭعى ءۇش جارىم جىلدا قازاقستان اۋىر سىن-قاتەرلەرمەن بەتپە-بەت كەلدى. پاندەميا، قاسىرەتتى قاڭتار وقيعاسى، بۇگىنگى گەوساياسي احۋال ەلىمىزدىڭ دامۋىنا ءوز سالدارىن تيگىزدى. سوعان قاراماستان ءبىز تاۋەلسىزدىگىمىزدى ساقتاپ، مەملەكەتتىلىگىمىزدى نىعايتىپ، بىرلىگىمىزدى ارتتىرا تۇستىك. قازىرگى تاڭدا ەلىمىز جاڭا ادىلەتتى قازاقستان قۇرۋ جولىنداعى تاريحي كەزەڭگە قادام باسىپ وتىر»، – دەدى رەسپۋبليكالىق قوعامدىق شتاب دەلەگاسياسىنىڭ باسشىسى ماۋلەن اشىمبايەۆ.
پەتروپاۆل قالاسىنداعى Kozybayev University ۋنيۆەرسيتەتىندە وتكەن جاستارمەن كەزدەسۋدە شتاب مۇشەلەرى ەلىمىزدىڭ بارلىق جاس ازاماتىن ءوز قابىلەتىن تولىق جۇزەگە اسىرۋى ءۇشىن الەۋمەتتىك-ەكونوميكالىق تەڭ مۇمكىندىكتەرمەن قامتاماسىز ەتۋگە قاتىستى سايلاۋ الدىنداعى باستاماعا نازار اۋداردى.
سونىمەن قاتار توقايەۆتىڭ جاقتاستارى س.مۇقانوۆ اتىنداعى وبلىستىق امبەباپ عىلىمي كىتاپحانادا جەرگىلىكتى ساراپشىلارمەن كەزدەستى. كەزدەسۋدە اپپاراتتىڭ تيىمدىلىگىن ارتتىرۋعا قاتىستى باسىمدىقتارى تالقىلاندى.
ودان بولەك، قاعاز ونىمدەرىن وندىرەتىن «Raduga KDR» كومپانياسىنىڭ جانە «Alageum Electric» ەلەكتروتەحنيكالىق زاۋىتىنىڭ ۇجىمدارىمەن كەزدەسۋلەر ءوتتى. كەزدەسۋ بارىسىندا  سايلاۋ الدىنداعى باعدارلامادا ايتىلعان ءقاۋىپسىز ەڭبەك ورتاسىن قۇرۋ جانە ەڭبەك زاڭناماسىن ىرىقتاندىرۋ ماسەلەلەرىن ءتۇسىندىردى.