ق ر اۋىل شارۋاشىلىعى ءمينيسترى ايداربەك ساپاروۆ تۇركيانىڭ اۋىل جانە ورمان شارۋاشىلىعى ءمينيسترىنىڭ ورىنباسارى ەبۋبەكير گيزليگيدەرمەن كەزدەستى.
اشم باسشىسى تۇركيا رەسپۋبليكاسىمەن اۋىل شارۋاشىلىعىنداعى ىنتىماقتاستىق قازاقستان ءۇشىن باسىم باعىتتاردىڭ ءبىرى ەكەنىن اتاپ ءوتتى. ماسەلەن، ەكى ەل اراسىنداعى اوك ءونىمى بويىنشا تاۋار اينالىمى 2023 جىلدىڭ 11 ايىندا 19%-عا ءوسىپ، 300 ملن اقش دوللارىن قۇرادى.
ايداربەك ساپاروۆ ءوزارا ساۋدانى ۇلعايتۋ، جەتكىزىلەتىن تاۋارلار نومەنكلاتۋراسىن كەڭەيتۋ جونىندەگى جۇمىستى جالعاستىرۋدى ۇسىندى. ءمينيستردىڭ ايتۋىنشا، تۇركيانىڭ اۋىلشارۋاشىلىق شيكىزاتىن وڭدەۋ سالاسىنداعى جەتىستىكتەرىن ەسكەرە وتىرىپ، قازاقستان وسى سالاداعى ىنتىماقتاستىقتى دامىتۋعا مۇددەلى.
«مينيسترلىك تۇرىك ينۆەستورلارىنا جاردەمدەسۋگە، قازاقستان تاراپتان سەرىكتەستەر ىزدەۋگە دايىن»، - دەپ اتاپ ءوتتى ا.ساپاروۆ.
ول سونداي-اق قازاقستاننىڭ ەۋرازيالىق ەكونوميكالىق وداقتىڭ مۇشەسى بولىپ تابىلاتىنىن، بۇل جەرگىلىكتى ءوندىرىس ونىمدەرىن ەكسپورتتاۋ مۇمكىندىكتەرىن كەڭەيتەتىنىن اتاپ ءوتتى.
اشم باسشىسىنىڭ ۇسىنىستارىن پرەزيدەنت رەجەپ ەردوعاننىڭ «قازاقستان – تۇركيا ينۆەستيسيا سالۋى ءتيىس ەل» دەگەن ءسوزىن كەلتىرە وتىرىپ، ەبۋبەكير گيزليگيدەر قولدادى. ەبۋبەكير گيزليگيدەر تۇقىم، جىلىجاي شارۋاشىلىعىنا جانە سۋارۋدى دامىتۋعا ينۆەستيسيا سالۋعا قىزىعۋشىلىعىن اتاپ ءوتتى.
قورىتىندىلاي كەلە، ايداربەك ساپاروۆ ەبۋبەكير گيزليگيدەردى 2024 جىلعى 19-22 ناۋرىزدا تاراز قالاسىندا وتەتىن تۇركى مەملەكەتتەرى ۇيىمىنا مۇشە مەملەكەتتەردىڭ اۋىل شارۋاشىلىعى مينيسترلەرىنىڭ كەزدەسۋىنە قاتىسۋعا شاقىردى.