10 ساۋىردە قازاقستان رەسپۋبليكاسىنىڭ پرەمەر-مينيسترى ولجاس بەكتەنوۆ باستاعان رەسپۋبليكالىق شتابتىڭ اياسىندا اۋىل شارۋاشىلىعى ءمينيسترى ايداربەك ساپاروۆ باتىس قازاقستان وبلىسىنا جۇمىس ساپارىمەن باردى.
ساپار بارىسىندا مينيستر سۋ تاسقىنىنان زارداپ شەككەن ەلدى مەكەندەردىڭ تۇرعىندارىمەن، سونداي-اق وسى اۋدانداردا ەگىن شارۋاشىلىعىمەن اينالىساتىن شارۋالارمەن كەزدەستى. ا.ساپاروۆ تۇرعىندار مەن كاسىپكەرلەردىڭ ماسەلەلەرىن تىڭداپ، سۋ تاسقىنى سالدارىنان ولگەن اۋىل شارۋاشىلىعى مالدارىنىڭ يەلەرىنە كەلتىرىلگەن شىعىندى وتەۋ باعىتىندا قانداي جۇمىستار اتقارىلىپ جاتقانىن ايتتى، دەپ حابارلايدى Almaty-akshamy.kz اۋىل شارۋاشىلىعى مينيمسترلىگىنە سىلتەمە جاساپ.
«مال يەلەرى جەرگىلىكتى جەردەگى شىعىندى وتەۋ كوميسسيالارىنا جۇگىنىپ، مالدىڭ جوعالۋ فاكتىسىن قۇجاتتاندىرۋى كەرەك، سول ارقىلى وتەماقى الۋعا بولادى»، - دەدى ا.ساپاروۆ.
مينيستر مال ولەكسەلەرىن جويۋ جۇمىستارىنىڭ بارىسىن تەكسەرىپ، جەرگىلىكتى جەرلەردە جۇمىس جۇرگىزىپ جاتقان رەسپۋبليكالىق ەپيزووتيالىق جاساق فيليالىندا قاجەتتى قۇرالدىڭ بار-جوعىنا كوز جەتكىزدى. ەپيزووتيالىق جاعدايدىڭ ناشارلاۋىنا جول بەرمەۋ ماقساتىندا جۇمىستى جانداندىرۋدى تاپسىردى.
سونداي-اق، ايداربەك ساپاروۆ رەسپۋبليكالىق ۆەتەريناريالىق زەرتحانانىڭ ورال قالاسىنداعى وبلىستىق فيليالىندا بولدى. وندا بۇعان دەيىن ءسىبىر جاراسى كومىلگەن جەرلەردەن سۋ باسقان توپىراق سىنامالارى جەتكىزىلگەن.
ەستەرىڭىزگە سالا كەتەيىك، باتىس قازاقستاندا سۋ تاسقىنى سالدارىنان ءسىبىر جاراسىنىڭ 3 كومىلگەن ورنى سۋ استىندا قالدى. ۆەتەريناريا جانە مەديسينا ماماندارىنان قۇرالعان ارنايى جۇمىس توپتارى وسى ۋچاسكەلەردەن توپىراق ۇلگىلەرىن الدى. ولار رەسپۋبليكالىق ۆەتەريناريالىق زەرتحانانىڭ ايماقتىق فيليالدارى مەن ۇلتتىق ۆەتەريناريالىق رەفەرەنتتىك ورتالىققا جەتكىزىلدى. بارلىق سىناقتار تەرىس ناتيجە كورسەتتى، ياعني توپىراق ۇلگىلەرىندە ءسىبىر جاراسىنىڭ سپورالارى انىقتالعان جوق.