وتكەن جىلى قازاقستاندىق ماماندار 13 مىڭنان استام اۋىل شارۋاشىلىعى تەحنيكاسىن شىعارعان.
قازاقستان ۇكىمەتى وتاندىق اۋىل شارۋاشىلىعى تەحنيكالارىن جاساۋدى قولداۋ ماقساتىندا ارنايى ورتالىق اشۋدى كوزدەپ وتىر. بۇل تۋرالى سالا ماماندارى ارنايى وتكەن باسقوسۋ بارىسىندا ايتتى، دەپ حابارلايدى Almaty-akshamy.kz.
ق ر ييدم «اشىق ساعات الاڭىندا» اۋىل شارۋاشىلىعى ماشيناسىن جاساۋ سالاسىنىڭ بۇگىنگى احۋالى مەن الداعى دامۋ باعىتى تارازىلاندى. قازاقستان اۆتوموبيل بيزنەسى قاۋىمداستىعى مەن «قازاقستاننىڭ ماشينا جاساۋشىلار وداعى» زتب وكىلدەرى جانە وتاندىق ءبىرقاتار كاسىپورىن باسشىلارىنىڭ قاتىسۋىمەن ۇيىمداستىرىلعان باسقوسۋ بەينەبايلانىس رەجيمىندە ءوتتى.
يندۋستريالىق دامۋ كوميتەتىنىڭ ءتوراعاسى ءىلياس وسپانوۆتىڭ ايتۋىنشا، وتكەن جىلى قازاقستاندىق زاۋىتتار 183 ملرد تەڭگە سوماسىندا 13 مىڭنان استام اۋىل شارۋاشىلىعى تەحنيكاسىن شىعارعان. بۇل تاراپتاعى ءوندىرىستىڭ جىلدىق ءوسىمى 130 پايىزدى قۇراپ، 2،3 ەسەگە ارتقان.
سونىمەن قاتار بيىل اۋىل شارۋاشىلىعى تەحنيكاسىن جەڭىلدەتىلگەن ليزينگكە بەرۋ باعدارلاماسىن ىسكە اسىرۋعا 40 ملرد تەڭگە ءبولىندى. ونىڭ 30 ملرد تەڭگەسى «جاسىل دامۋ» اق قاراجاتىنان جانە 10 ملرد تەڭگەسى «قازاگروقارجى» اق كاپيتال نارىعىنان تارتىلدى. بۇدان بولەك، «ونەركاسىپتى دامىتۋ قورى» تراكتورلار مەن كومباينداردى ليزينگتىك قارجىلاندىرۋ ءۇشىن 7 ملرد تەڭگە قاراجات بولمەك.
«ەلىمىزدە اۋىل شارۋاشىلىعى ماشيناسىن جاساۋدى دامىتۋ — باسىمدىققا يە مەملەكەتتىك مىندەتتىڭ ءبىرى. وسى رەتتە وتاندىق اۋىل شارۋاشىلىعى تەحنيكالارىن جاساۋدى قولداۋ ماقساتىندا اۋىل شارۋاشىلىعى ماشيناسىن جاساۋدى دامىتۋدىڭ ۇلتتىق ورتالىعى قۇرىلاتىن بولادى. قازىرگى كۇندە بۇل باعىتتا ءتيىستى جۇمىستار جۇرگىزىلۋدە. سەبەبى، ەلىمىزدە اگرارلىق سەكتوردا رەسۋرستار جەتكىلىكتى جانە بۇل ونىمدەردى تۇتىنۋشىلار سانى باسىم»، – دەپ اتاپ ءوتتى يندۋستريالىق دامۋ كوميتەتىنىڭ ءتوراعاسى.
«اشىق ساعات الاڭىندا» ماماندار سالاداعى ءبىرقاتار تۇيتكىلدى ماسەلەنى ورتاعا سالىپ، وڭتايلى شەشۋ جولدارىن قاراستىردى. جيىن بارىسىندا كوتەرىلگەن ساۋالدار مەن ۇسىنىستار بويىنشا ارنايى تالداۋ جۇمىستارى جۇرگىزىلەتىن بولادى.