اۋىل شارۋاشىلىعى مينيسترلىگى اۋىل شارۋاشىلىعى جانۋارلارىنىڭ سانىن ناقتىلاۋ ماقساتىندا «اۋىل شارۋاشىلىعى جانۋارلارىن سايكەستەندىرۋ» اقپاراتتىق جۇيەسىندەگى مالىمەتتەردى تۇزەتۋ بويىنشا جۇيەلى جۇمىسىن جالعاستىرۋدا.
بۇل جۇيەدە مالدى تىركەۋ، قايتا تىركەۋ، ەسەپتەن شىعارۋ جانە ورىن اۋىستىرۋ راسىمدەرى جۇرگىزىلەدى، دەپ حابارلايدى aqshamnews.kz.
دەرەكتەر بازاسىن تەحنيكالىق جەتىلدىرۋ اياسىندا كەلەسى فورماتتىق-لوگيكالىق باقىلاۋ فۋنكسيالارى ەنگىزىلدى:
«تولدەۋ» سەبەبى بويىنشا ءىقم تىركەۋ: بۇزاۋدى مىندەتتى تۇردە انالىق مالدىڭ جسن-مەن بايلانىستىرۋ ەنگىزىلدى. بۇل جانۋاردىڭ شىعۋ تەگىن ناقتى ەسەپكە الۋدى قامتاماسىز ەتىپ، دەرەكتەر ەنگىزۋ كەزىندە قاتەلىكتەردى بولدىرمايدى.
«جەكە تۇتىنۋ ءۇشىن سويىلدى» سەبەبى بويىنشا ەسەپتەن شىعارۋ: راسىمدەردى كەشىكتىرىپ ورىنداعان جاعدايدا ايىپپۇل سالۋ تەتىگى ىسكە قوسىلدى. بۇل جانۋارلاردىڭ نەگىزسىز ەسەپتە تۇرۋىن بولدىرماي، ۋاقتىلى ەسەپتەن شىعارۋدى قامتاماسىز ەتەدى.
ساتىپ الۋ-ساتۋ راسىمدەرى: مەنشىك قۇقىعىن بەرۋ فۋنكسياسى جاڭارتىلدى. بۇل مامىلەلەردى راسىمدەۋ دالدىگىن ارتتىرىپ، «انىقتالماعان» مالدىڭ جيناقتالۋىنا جول بەرمەيدى.
ۆاكسيناسيا كەزىندە شەكتەۋلەر: ۆاكسينانىڭ قولدانىلۋ كەزەڭىندە كەيبىر وپەراسيالاردى جۇرگىزۋگە تىيىم سالىندى. بۇل جالعان مامىلەلەردى بولدىرماي، ۆەتەريناريالىق تالاپتاردىڭ ساقتالۋىن قامتاماسىز ەتەدى.
سويۋدان كەيىنگى ەتتى ساقتاۋ فۋنكسياسى: ەتتى ۇزاق مەرزىمگە ساقتاۋ ءۇشىن جونەلتۋدى تىركەۋ مۇمكىندىگى ەنگىزىلدى. بۇل ساراپتاما اكتىلەرىن قولدانۋ ارقىلى اشىقتىقتى جانە باقىلاۋدى ارتتىرادى.
بۇل باعىتتاعى جۇمىستار جالعاسۋدا.