الماتى وبلىسى ۇيعىر اۋدانىنداعى ورتا مەكتەپتەردىڭ بىرىندە بار بولعانى 50 بالا وقيدى. وسىنداي از وقۋشىمەن 32 ءمۇعالىم جۇمىس ىستەيدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
بۇل تۋرالى الماتى وبلىسىنىڭ اكىمى مارات سۇلتانعازييەۆتىڭ جۇمىس ساپارى بارىسىندا بەلگىلى بولدى.
"بىرلىك سۇمبە مەكتەبىندە 125 بالا وقيدى. جاناساي نەگىزگى مەكتەبىندە 50 وقۋشى بار، ولاردى 32 ادامنان تۇراتىن ۇجىم وقىتادى. ەكى مەكتەپ تە جوندەۋدى قاجەت ەتەدى، ەكىنشى مەكتەپ 1956 جىلى سالىنعان"، - دەدى ءبىلىم باسقارماسىنىڭ باسشىسى سالتانات بەسپايەۆا.
سونىمەن قاتار وسى اۋداننىڭ سۇمبە اۋىلىندا 750 وقۋشىعا ارنالعان باسقا مەكتەپ جۇمىس ىستەيدى، وندا 348 وقۋشى بار. وقۋ مەكەمەسىنىڭ عيماراتى 1978 جىلى سالىنعان. ستوماتولوگيا كابينەتى بار. نەگىزگى سپورتزالدان باسقا، ءتۇرلى ترەناجەرى بار فيتنەس-ورتالىق اشىلدى، بوكس زالى جابدىقتالعان. سالتانات بەسپايەۆانىڭ ايتۋىنشا، وقۋ ورنىندا بالالاردىڭ وقۋىنا جانە جان-جاقتى دامۋىنا بارلىق جاعداي جاسالعان.
وبلىس اكىمى مارات سۇلتانعازييەۆ بالالاردى ەكى مەكەمەدەن سۇمبە مەكتەبىنە اۋىستىرۋدى تاپسىردى. بوساعان جەردى قوسىمشا ءبىلىم بەرۋ مەكتەبى رەتىندە پايدالانۋ ۇسىنىلدى. سونىمەن قاتار، وبلىس اكىمى جابىلاتىن مەكتەپتەردىڭ پەداگوگتارىن اۋداننىڭ باسقا ءبىلىم بەرۋ مەكەمەلەرىنە جۇمىسقا ورنالاستىرۋدى تاپسىردى.