قازاقستاندا مەكتەپتەردىڭ 70%-عا جۋىعى - اۋىلدىق جەرلەردە ورنالاسقان جانە كوپشىلىگى شاعىن جيناقتى مەكتەپتەر. قالا مەن اۋىل مەكتەپتەرى اراسىنداعى ءبىلىم ساپاسىنىڭ الشاقتىعىن ازايتۋ ماقساتىندا 2023 جىلدان باستاپ ەلىمىزدە «اۋىل مەكتەبى – ساپا الاڭى» جوباسى قولعا الىنعان، دەپ حابارلايدى aqshamnews.kz.
ونىڭ ىشىندە اقتوبە وبلىسىندا «سيفرلىق تەحنولوگيالاردى پايدالانا وتىرىپ شاعىن جيناقتى اۋىل مەكتەپتەرىنىڭ الەۋەتىن دامىتۋ»، الماتى وبلىسىندا «جاراتىلىستانۋ-ماتەماتيكالىق باعىتتاعى پاندەر بويىنشا ءبىلىم بەرۋ ساپاسىن ارتتىرۋ»، ماڭعىستاۋ وبلىسىندا «وتپان» تىرەك مەكتەپتەرىنىڭ جەلىسىن دامىتۋ»، ۇلىتاۋ وبلىسىندا «Ustaz Ulytau» سياقتى وڭىرلىك باستامالار جۇزەگە اسىرىلۋدا.
اتاپ ايتساق، 2023 جىلى اقتوبە وبلىسىندا 12 تىرەك مەكتەپ پەن 134 شاعىن جيناقتى مەكتەپ، 2024 جىلى اقمولا، قوستاناي، پاۆلودار، باتىس قازاقستان جانە سولتۇستىك قازاقستان وبلىستارىندا تاعى 10 تىرەك جانە 30 شاعىن جيناقتى مەكتەپ جوباعا قاتىستى. 2025–2026 وقۋ جىلىندا تاعى 1600 اۋىل مەكتەبى قوسىلادى دەپ جوسپارلانۋدا.
جوبانى ىسكە اسىرۋدىڭ ناتيجەسىندە مەكتەپتەردىڭ ماتەريالدىق-تەحنيكالىق بازاسى جاڭارتىلدى، زاماناۋي پاندىك جانە سيفرلىق كابينەتتەرمەن جابدىقتالدى، سونداي-اق، جىلدامدىعى جوعارى ينتەرنەتپەن قامتاماسىز ەتۋ شەشىمىن تاپتى.
جوبانىڭ ماڭىزدى تۇسىنىڭ ءبىرى — ونلاين وقىتۋ. وقۋشى مەن ءمۇعالىم سانى از اۋىل مەكتەپتەرىندە ماتەماتيكا، فيزيكا، حيميا، بيولوگيا جانە اعىلشىن ءتىلى پاندەرىنەن ونلاين ساباقتار وتكىزىلەدى.
«كەيبىر اۋىل مەكتەپتەرىندە ءبىر ءمۇعالىم بىرنەشە پاننەن ساباق بەرىپ ءجۇر. جاڭا جوبانىڭ ارقاسىندا تىرەك مەكتەپتەرىنىڭ ۇستازدارى شاعىن جيناقتى مەكتەپتەگى وقۋشىلاردى ونلاين وقىتادى، ياعني ءار پاننەن ءوز ءىسىنىڭ بىلىكتى مامانى ءدارىس بەرەدى. بۇل بالالاردىڭ ءبىلىم ساپاسىن جاقسارتىپ قانا قويماي، اۋىل مۇعالىمدەرىنىڭ دە كاسىبي بىلىكتىلىگىن ارتتىرۋعا مۇمكىندىك بەرەدى»، — دەدى ى.التىنسارين اتىنداعى ۇلتتىق ءبىلىم اكادەمياسىنىڭ پرەزيدەنتى نازيپا ايۋبايەۆا.
سونىمەن قاتار مۇعالىمدەرگە ادىستەمەلىك قولداۋ كورسەتىلۋدە: سيفرلىق ساۋاتتىلىق كۋرستارى وقىتىلادى، تەحنولوگيالاردى قولدانۋ مەن وقۋ باعدارلامالارىن اۋىل مەكتەپتەرىنە بەيىمدەۋ بويىنشا ترەنينگتەر وتكىزىلەدى. بۇگىنگە دەيىن 10-نان استام رەسپۋبليكالىق ءىس-شارا ۇيىمداستىرىلعان، بۇل باعىتتاعى جۇمىس الداعى ۋاقىتتا دا جالعاسادى.