«اۋىل – ەل بەسىگى»

پرەزيدەنتتىڭ جاڭا مەرزىمدەگى العاشقى جارلىعى اۋىلدى دامىتۋ جونىندە بولادى

مەملەكەت باسشىسى قاسىم-جومارت توقايەۆ بۇگىن اۋىلدى دامىتۋ ماسەلەسى تۋرالى جارلىققا قول قويادى، دەپ حابارلايدى almaty-akshamy.kz

«ءقازىر – سايلاۋداعى جەڭىستى تويلايتىن كەز ەمەس، ايانباي ەڭبەك ەتەتىن كەز. سول سەبەپتى، ارقانى كەڭگە سالماي، بىردەن ىسكە كىرىسۋىمىز كەرەك، بوساڭسۋعا بولمايدى. وسى ورايدا، ەڭ الدىمەن قولعا الاتىن بىرنەشە ماسەلەگە ارنايى توقتالعىم كەلەدى. مەن سايلاۋالدى سوزدەرىمدە اۋىلدى وركەندەتۋ ىسىنە باسا نازار اۋداردىم. بۇگىندە قازاقستان حالقىنىڭ 40 پايىزعا جۋىعى اۋىلدا تۇرادى. «اۋىل – ەل بەسىگى» دەپ حالقىمىز بەكەر ايتقان جوق. سوندىقتان، اۋىلداعى جاعدايدى جاقسارتا الماساق – بارىمىزگە سىن. سول ءۇشىن مەن بۇگىن اۋىلدى دامىتۋ ماسەلەسى تۋرالى جارلىققا قول قويامىن»، - دەدى قاسىم-جومارت توقايەۆ پرەزيدەنتتى ۇلىقتاۋ راسىمىندە.

پرەزيدەنت وسى قۇجات ارقىلى ۇكىمەتكە اۋىلدى دامىتۋدىڭ 5 جىلعا ارنالعان ناقتى جوسپارىن ازىرلەۋدى تاپسىراتىنىن ايتتى.

«بۇل مەنىڭ جاڭا پرەزيدەنتتىك مەرزىمدەگى ءبىرىنشى جارلىعىم بولادى. ۇكىمەت اۋىلدى دامىتۋعا ارنالعان بارلىق جوبانى جۇيەلى تۇردە رەتتەپ، جيناقتاۋعا ءتيىس. سودان كەيىن ماقساتتى تۇردە ءتيىمدى جۇمىس جۇرگىزەمىز»، - دەدى ق. توقايەۆ.