اۋىل اكىمى ورتەنىپ جاتقان ۇيدەن گاز باللونىن الىپ شىقتى

ءۇي يەسى ايەلى مەن بالالارىن تەرەزەدەن الىپ شىققان

تاڭەرتەڭگى ساعات 07:50 شاماسىندا قونايەۆ قالاسىنا جاقىن ورنالاسقان شەڭگەلدى اۋىلدىق وكرۋگىندەگى ۇيلەردىڭ بىرىنەن ءورت شىقتى، دەپ حابارلايدى Almaty-akshamy.kz.

الماتى وبلىسى اكىمدىگىنىڭ باسپا ءسوز قىزمەتىنىڭ حابارلاۋىنشا، ورتتەن شىققان ءتۇتىندى سول ساتتە قاسىنان ءوتىپ بارا جاتقان اۋىل اكىمى ماقسات جازييەۆ بايقاپ قالىپ، بىردەن ورتەنىپ جاتقان ۇيگە بارعان.

«ءۇي جانىنا توقتادىم. سول كەزدە Mazda كولىگى ءدال قاسىما توقتادى. وسى كەزدە ءۇي يەسى ايەلى مەن بالالارىن تەرەزەدەن الىپ شىققان. ويلانۋعا ۋاقىت بولمادى. جاقىن جەردە بولعان ءبىر اداممەن بىرگە ءبىز ۇيدەن گاز باللونىن شىعاردىق. ولار ءورت سوندىرۋشىلەردى كۇتىپ تۇرعاندا، ءۇيدىڭ توبەسىنە شىعىپ، شلانگتان سۋ قۇيىپ، وتتى ۇستاپ تۇردىق»، - دەدى ماقسات جازييەۆ.

قونايەۆ قالاسى اكىمدىگىنىڭ باسپا ءسوز قىزمەتىنىڭ حابارلاۋىنشا، وقيعا ورنىنا 86621 اسكەري ءبولىمىنىڭ ءورت ءسوندىرۋ ءبولىمى شۇعىل جەتكەن. ءورت تولىعىمەن ءسوندىرىلدى. قازا تاپقاندار مەن زارداپ شەككەندەر جوق. ءۇيدى قالپىنا كەلتىرۋگە اكىمدىك قولداۋ كورسەتەدى.