ەڭ ءبىرىنشى تالاپ – كانديداتتىڭ 25 جاسقا تولۋى.
ورتالىق سايلاۋ كوميسسياسىنىڭ مۇشەسى ەرلان داۋىلبايەۆ اۋىل اكىمىنە كانديداتتىڭ سايكەستىگىن انىقتاۋ جۇمىسى قالاي جۇرگىزىلەتىنىن باياندادى، دەپ حابارلايدى Almaty-akshamy.kz "ەگەمەن قازاقستان" باسىلىمىنا سىلتەمە جاساپ.
ونىڭ ايتۋىنشا، كانديداتتارعا قويىلاتىن بىرنەشە تالاپ بار ەكەن. ياعني كانديدات اۋىلدىق ماڭىزى بار قالا، اۋىل، كەنت، اۋىل وكرۋگى اكىمى بولىپ سايلانۋ ءۇشىن قازاقستان ازاماتى «سايلاۋ تۋرالى» كونستيتۋسيالىق زاڭدا، «قازاقستان رەسپۋبليكاسىنداعى جەرگىلىكتى مەملەكەتتىك باسقارۋ جانە ءوزىن-وزى باسقارۋ تۋرالى» زاڭىنىڭ 36-بابىندا جانە مەملەكەتتىك قىزمەت سالاسىنداعى زاڭنامادا كوزدەلگەن مىناداي تالاپتارعا سايكەس كەلۋگە ءتيىس.
«ءبىرىنشى، كانديداتتىڭ 25 جاسقا تولعاندىعى. ەكىنشى، زاڭدا بەلگىلەنگەن تارتىپپەن تانىلعان ىس-ارەكەتكە قابىلەتتىلىگى، سوتتىلىعىنىڭ بولماۋى جانە سىبايلاس جەمقورلىق قىلمىس، سىبايلاس جەمقورلىق قۇقىق بۇزۋشىلىق جاساۋىنىڭ بولماۋى. ءۇشىنشى، مەملەكەتتىك قىزمەت سالاسىنداعى زاڭنامانىڭ تالاپتارىنا سايكەستىگىن ءتيىستى اۋداندىق سايلاۋ كوميسسياسى ۇسىنعان قۇجاتتار نەگىزىندە مەملەكەتتىك قىزمەت ىستەرى جونىندەگى ۋاكىلەتتى ورگان انىقتايدى»، – دەدى ەرلان داۋىلبايەۆ.
بۇدان بولەك، ەرلان داۋىلبايەۆ اۋىل اكىمىنە كانديداتتىڭ سايكەستىگىن انىقتاۋ جۇمىسى قالاي جۇرگىزىلەتىنىن دە باياندادى. ونىڭ ايتۋىنشا، اۋماقتىق سايلاۋ كوميسسياسى كانديدات ۇسىنىلعاننان كەيىن ونىڭ زاڭنامادا قويىلاتىن تالاپتارعا سايكەستىگىن انىقتاۋ پروسەسىنە دەرەۋ كىرىسەدى.
«بۇل ءۇشىن ازاماتتىعىن انىقتاۋ ماقساتىندا ىشكى ىستەر ورگاندارىنا، زاڭدا بەلگىلەنگەن تارتىپپەن وتەلمەگەن نەمەسە الىنباعان سوتتىلىعىن، زاڭدا بەلگىلەنگەن تارتىپپەن تانىلعان سىبايلاس جەمقورلىق قىلمىسىنىڭ، سىبايلاس جەمقورلىق قۇقىق بۇزۋشىلىعىنىڭ بولماۋىن پروكۋراتۋرا ورگاندارىنان، كانديداتتاردىڭ مەملەكەتتىك قىزمەت تۋرالى زاڭنىڭ تالاپتارىنا سايكەس جانە وسى لاۋازىمعا قويىلاتىن بىلىكتىلىك تالاپتارىنا سايكەستىگىن بەلگىلەۋ تۇرعىسىنان مەملەكەتتىك قىزمەت ىستەرى جونىندەگى وڭىرلىك دەپارتامەنتتەرگە ءتيىستى سۇراۋلار جىبەرىلەدى. جۇمىسقا تارتىلعان جوعارىدا اتالعان مەملەكەتتىك ورگاندار جەدەل تارتىپپەن دەرەكتەردىڭ ءتيىستى دەڭگەيدە تەكسەرىلۋىن جانە ناتيجەلەرىنىڭ اۋماقتىق كوميسسيالارعا دەرەۋ ۇسىنىلۋىن قامتاماسىز ەتۋلەرى قاجەت»، – دەدى ورتالىق سايلاۋ كوميسسياسىنىڭ مۇشەسى.