الماتىدا اۋعانستان ونىمدەرىنىڭ كورمەسى ۇيىمداستىرىلدى.
اۋعانستاندىق زەرگەرلىك بۇيىمدار – بۇل ەجەلگى ونەردىڭ ۇلگىسى، وندا شەبەرلىك، ءداستۇر مەن حالىقتىڭ مادەنيەتى استاسادى. بۇگىندە اۋعان زەرگەرلەرى ءوز اتا-بابالارىنىڭ رۋحىمەن جۇمىس ىستەپ، الەمنىڭ تۇكپىر-تۇكپىرىندە ادامداردىڭ جۇرەگىن جاۋلايتىن اشەكەيلەردى جاسايدى.
نەگىزگى ماتەريالدار – التىن، كۇمىس جانە مىس. اۋعان زەرگەرلەرىنىڭ ايرىقشا ەرەكشەلىگى – ەل اۋماعىندا وندىرىلەتىن تابيعي اسىل تاستاردى قولدانۋ. باداحشان پروۆينسياسىنان الىنعان لازۋريت الەمدەگى ەڭ جاقسى دەپ سانالادى. ال اۋعان يزۋمرۋدتارى مەن رۋبيندەرى ءوزىنىڭ تازالىعى جانە ءتۇسىنىڭ قانىقتىلىعىمەن تانىمال. كوپتەگەن اشەكەي بۇيىمدار قولمەن جاسالادى، جانە ءاربىر زەرگەر بۇيىمنىڭ كۇردەلىلىگىنە بايلانىستى ءبىر ايدان بىرنەشە ايعا دەيىن ۋاقىت جۇمسايدى.
اۋعانستان جىل سايىن شامامەن 10 توننا زەرگەرلىك بۇيىمدار شىعارادى. ونىڭ باسىم بولىگى ەكسپورتتالادى. نەگىزگى نارىقتار – تاياۋ شىعىس، ەۋروپا، اقش جانە جۇڭگو ەلدەرى. 2023 جىلى زەرگەرلىك بۇيىمداردىڭ ەكسپورتى شامامەن 120 ميلليون اقش دوللارىن قۇرادى. بۇل بىرەگەي اۋعان تاستارىمەن بەزەندىرىلگەن قولونەر بۇيىمدارىنا دەگەن سۇرانىستىڭ ارتىپ كەلە جاتقانىن كورسەتەدى. كورمەدە لياپيس-لازۋر، تۋرمالين، نەفريت، گاگات، ساپفير، زۋمرۋت جانە باسقا دا باعالى جانە جارتىلاي باعالى تاستاردان جاسالعان اشەكەيلەر ۇسىنىلدى.
«قازاقستان مەن اۋعانستان اراسىندا ساۋدا-ساتتىق ارتىپ كەلەدى. كورمەدە قولونەر جانە زەرگەرلىك بۇيىمى، كىلەم، كوكونىس پەن جەمىستەر، قۇرىلىس ماتەريالدارى، بىلعارى ونىمدەرى قويىلعان. الماتىعا 150 بيزنەس قوعامىنىڭ وكىلدەرى كەلدى. بۇل بيزنەس ساۋدانىڭ دامۋىنا جوعارى قىزىعۋشىلىق پەن نىعايتۋدىڭ جوعارى دەڭگەيىن كورسەتەدى ، – دەدى ق ر پرەمەر-مينيسترىنىڭ ورىنباسارى سەرىك جۇمانعارين.
ەكى ەل اراسىنداعى ساۋدا-ساتتىق، كاسىپ سالاسى جاندانۋ ۇستىندە. بۇل جايىندا قازاقستان ساۋدا پالاتاسىنىڭ ايماقتىق وكىلى ارمان ەسەنتايەۆ ءسوز سويلەدى.
«ەكى جاقتى ساۋدا ىنتىماقتاستىقتى دامىتۋعا ۇلەس قوسىپ، ساۋدا-ساتتىقتى دامىتىپ، ەكى ەل اراسىنداعى الەۋمەتتىك، مادەني ىقپالداستىقتى ارتتىرىپ كەلەدى. قوس تاراپ تا بيزنەس قارىم-قاتىناسىنا بەلسەندى اتسالىسىپ جاتىر، – دەدى ول.
سونىمەن قاتار ساۋدا ىنتىماقتاستىقتى ودان ءارى دامىتۋ باعىتىندا وي ايتىلدى.
«بۇل كورمەنىڭ ءمان-ماعىناسى زور. ءوز كەزەگىندە ەلدەرىمىز اراسىنداعى ساۋدا قاتىناستارىنىڭ ودان ارى قارقىن الۋىنا پايداسىن تيگىزەدى. سونداي-اق جەكە سەكتوردىڭ وركەندەۋىنە مۇمكىندىك بەرەدى»، – دەدى اۋعانستان بيزنەس وكىلى نۇراحمات نۋري.
