جەر سىلكىنىسى قازاقستاننان بولەك، 4 ەلدە سەزىلدى.
سەيسەنبى كۇنى كەشكە اۋعانستاندا بولعان جەر سىلكىنىسىنەن پاكىستاننىڭ حايبەر-پاحتۋنحۆا پروۆينسياسىندا كەم دەگەندە 9 ادام قازا بولدى. اۋعانستان شىعىسىنداعى لاگمان پروۆينسياسىندا تاعى ەكى ادام كوز جۇمدى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
News گازەتى سارسەنبى كۇنى پاكىستاننىڭ حايبەر-پاحتۋنحۆا پروۆينسياسىنىڭ تابيعي اپاتتارمەن كۇرەس جونىندەگى باسقارماسىنىڭ جاڭارتىلعان مالىمەتىنە سىلتەمە جاساپ جازۋىنشا، ءزىلزالا سالدارىنان مەرت بولعاندار سانى قازىرگى ۋاقىتتا 9 ادامدا قۇراپ وتىر، تاعى 44ء-ى جاراقاتتاندى.
سەيسەنبى كۇنى Dawn باسىلىمى حايبەر-پاحتۋنحۆادا تۇرعىن ۇيلەردىڭ شاتىرى مەن قابىرعالارىنىڭ قۇلاۋىنان ەكى ادام كوز جۇمىپ، التاۋى زارداپ شەككەنى تۋرالى ءمالىم ەتكەن ەدى. ءوز كەزەگىندە Reuters اگەنتتىگى پاكىستان پوليسياسىنا سىلتەمە جاساي وتىرىپ، سۆات وكرۋگىندە 150-گە جۋىق ادام جاراقات العانىن جازدى. وكرۋگ اۋرۋحانالارى جوعارى دەڭگەيدەگى دايىندىق رەجيمىنە اۋىستىرىلدى.
Dawn مالىمەتىنە سايكەس، جەراستى دۇمپۋلەرى حايبەر-پاحتۋنحۆادان بولەك، پاكىستاننىڭ وزگە وڭىرلەرىندە دە سەزىلگەن. سونىڭ ىشىندە پەشاۆار، لاحور، كۆەتتا، راۆالپيندي جانە يسلاماباد بار.
ونىمەن قوسا، اۋعانستاننىڭ تابيعي اپاتتار سالدارىن تومەندەتۋ جونىندەگى باسقارماسىنىڭ وكىلى Reuters اگەنتتىگىنە ءمالىم ەتكەندەي، لاگمان پروۆينسياسىندا 2 ادام قازا بولعان.
ەۋروپا – جەرورتا تەڭىزى سەيسمولوگيالىق ورتالىعى سەيسەنبى كۇنى اۋعانستاندا 6،8 ماگنيتۋداسىمەن جەر سىلكىنگەنىن تىركەدى. كەيىن سەيسمولوگتار ماگنيتۋدانىڭ 6،5 بولعانىن ءمالىم ەتتى. وشاعى اۋعانستاننىڭ پاكىستان جانە تاجىكستانمەن شەكاراسىنا جاقىن جەردە، 12 مىڭنان استام حالىق تۇراتىن يشكاشيم قالاسىنان وڭتۇستىك-باتىسقا قاراي 48 كم قاشىقتىقتا ورنالاستى. تەرەڭدىگى – 185 كم. جەراستى ءدۇمپۋىن، سونداي-اق قازاقستان، ءۇندىستان، تاجىكستان، وزبەكستان ەلدەرى سەزىندى.