اۋعانستاندا «مەن – قازاقپىن» دەيتىندەر كوبەيدى – ق ر ءسىم

ولاردىڭ كەيبىرەۋلەرى قازاق تىلىندە سويلەي المايدى.

 ق ر ءسىم-نىڭ رەسمي وكىلى اۋعانستاندا وزدەرىن قازاقپىز دەيتىن باسقا ۇلت وكىلدەرىنىڭ كوبەيگەنىن ايتتى، دەپ حابارلايدى Almaty-akshamy.kz

 «سوڭعى كۇندەرى قازاقستاننىڭ اۋعانستانداعى ەلشىلىگىنە وزدەرىن قازاقپىز دەپ تانىستىراتىن ازاماتتاردىڭ جۇگىنۋى جيىلەپ كەتتى. ءىس جۇزىندە ولاردىڭ ەشقانداي دالەلدەرى جوق. ولاردىڭ كەيبىرەۋلەرى قازاق تىلىندە سويلەي المايدى. سونداي-اق اتا-بابالارىنىڭ اۋعانستان اۋماعىنا قونىس اۋدارۋ تاريحىمەن، رۋ-تايپالىق بايلانىستارى تۋرالى دا ايتا المايدى. ءبىز ەتنيكالىق قازاقتاردىڭ تاريحي وتانىنا ورالۋىنا كومەك كورسەتۋ تۋرالى بارلىق وتىنىشتەرگە مۇقيات تەكسەرۋ جۇمىستارىن جۇرگىزەمىز. ول ءبىر كۇندىك جۇمىس ەمەس سوندىقتان ۋاقىت تالاپ ەتەدى»، - دەيدى ايبەك سمادياروۆ.

 ءقازىر اۋعانستان اۋماعىندا 15-كە جۋىق ەتنيكالىق قازاق وتباسى تۇرىپ جاتىر.

 «اۋعانستاندا قالىپ قويعان قازاقستاندىقتار ەلگە قايتقىسى كەلسە، كابۋلداعى ءبىزدىڭ ەلشىلىككە حابارلاسسىن. سول جەردە  ءتيىستى شارالار قابىلدانادى. ەلگە ورالعىسى كەلگەن وتانداستارىمىزعا كومەك كورسەتۋگە ءازىرمىز. سول ءۇشىن دە اۋعانستانداعى قازاقستان ەلشىلىگى تاراپىنان ارنايى كوميسسيا قۇرىلدى»، - دەدى مينيسترلىك وكىلى.