اۋەزوۆ اۋدانىندا دا مەكتەپ سالۋ جانە ولاردى كەڭەيتۋ ماسەلەسى جولعا قويىلعان

وقۋشى ورىندارىنىڭ تاپشىلىعىن ازايتۋ ماقساتىندا اۋداندا 2022 جىلعا 1 مەكتەپتى اشۋ، 3 مەكتەپتى كەڭەيتۋ جانە 2 جاڭا مەكتەپتى جوبالاۋ جوسپارلانعان.

بيىلعى ماۋسىم ايىندا 4ء-شى شاعىناۋداندا 400 ورىندىق «دوستىق» جەكە مەكتەبى اشىلدى، دەپ حابارلايدى Almaty-akshamy.kz.

بۇل تۋرالى بۇگىن الماتى قالاسىنىڭ اكىمى ەربولات دوسايەۆتىڭ اۋەزوۆ اۋدانى تۇرعىندارىمەن وتكەن كەزدەسۋىندە ايتىلدى. 

قالا باسشىسىنىڭ ايتۋىنشا، 1 قىركۇيەككە قاراي №117 مەكتەپكە 900 ورىندىق جانە №132 مەكتەپكە 825 ورىندىق 2 جاپسارجاي پايدالانۋعا بەرىلەدى.

«الەۋمەتتىك جاۋاپكەرشىلىك شەڭبەرىندە قۇرىلىس سالۋشى Everest Development  جىلدىڭ سوڭىنا دەيىن 400 ورىندىق №104 مەكتەپكە 2ء-شى شاعىناۋداندا قوسىمشا قۇرىلىس سالۋعا جوبالاۋ-سمەتالىق قۇجاتتاما ازىرلەۋدى جوسپارلاپ وتىر. قۇرىلىس-مونتاجداۋ جۇمىستارى 2023 جىلعا جوسپارلانعان»، - دەدى قالا اكىمى.

سالىنىپ جاتقان «City plus» جانە «بەلكاميت» تۇرعىن ءۇي كەشەندەرىنىڭ جانىندا قۇرىلىس سالۋشى "قازاقستروي" 1 500 ورىندىق 2 جاڭا مەكتەپ جانە 800 ورىندىق 2 بالاباقشا سالۋدى جوسپارلاپ وتىر.

«City plus» كەشەنىنىڭ جانىندا 600 ورىندىق مەكتەپ جانە 300 ورىندىق بالاباقشا سالۋ ءۇشىن اكىمدىك جەر ۋچاسكەسىن الىپ قويۋدى جۇرگىزۋدە.

«900 ورىندىق ەكىنشى مەكتەپ پەن 500 ورىندىق بالاباقشا قۇرىلىسى بويىنشا قۇرىلىس سالۋشى بۇرىنعى «بەلكاميت» زاۋىتى اۋماعىنىڭ ءبىر بولىگىن ساتىپ الۋعا ارەكەت جاساۋدا. وسى ءتورت ءبىلىم بەرۋ نىسانى بويىنشا جوبالاۋ-سمەتالىق قۇجاتتامانى كەلەسى جىلدىڭ ءى جارتىجىلدىعىندا ازىرلەپ، ال قۇرىلىستى 2023 جىلدىڭ ءىى جارتىجىلدىعىندا باستاپ، 2024 جىلى پايدالانۋعا بەرۋ جوسپارلانۋدا»، - دەدى قالا باسشىسى ەربولات دوسايەۆ.