اۋەزوۆ اۋدانىندا اۋلالاردى كوركەيتۋ جۇمىستارى جالعاسۋدا: تۇرعىندارعا جايلى جاعداي قالاي جاسالىپ جاتىر
اۋەزوۆ اۋدانىندا بيىل جۇزەگە اسىرىلعان ماڭىزدى نىساندارمەن تانىسۋ ءۇشىن باسپا ءسوز تۋرى ءوتتى. اۋدان اكىمى ابزال ەگەمبەردييەۆ پەن جوبا قاتىسۋشىلارى اۋدانداعى جەتىستىكتەر تۋرالى ەگجەي-تەگجەيلى باياندادى، دەپ حابارلايدى aqshamnews.kz
باسپا ءسوز تۋرىنىڭ العاشقى نىسانى №2 شاعىن اۋدانىنداعى «حالىق قاتىساتىن بيۋدجەت» باعدارلاماسى اياسىندا كورىكتەندىرىلگەن اۋلا بولدى.
بۇل اۋماق №41 جانە №42 ۇيلەردىڭ اراسىندا ورنالاسقان. بيىل مۇندا 390 شارشى مەترلىك فۋتبول الاڭى سالىندى، بالالار جانە سپورتتىق الاڭدار جاڭارتىلدى، 19 كوشە جارىعى تىرەكتەرى مەن 12 بەينەباقىلاۋ كامەراسى ورناتىلدى. سونداي-اق 300 مەترلىك جاسىل قورشاۋ جانە 50 اعاش وتىرعىزىلىپ، 3 مىڭ شارشى مەتردەن استام جاسىل جەلەكتى سۋارۋ جۇيەسى ىسكە قوسىلدى. ۇزىندىعى 400 مەتر تروتۋار توسەلدى.
اۋلانى سوڭعى رەت قايتا جاڭارتۋ 2017 جىلى كۇردەلى جوندەۋ باعدارلاماسى اياسىندا جۇرگىزىلگەن، سودان كەيىن تەك كوسمەتيكالىق جانە اعىمداعى جوندەۋ جۇمىستارى جۇرگىزىلگەن.
بىلتىر ەربولات دوسايەۆتىڭ تاپسىرماسى بويىنشا 174 اۋلا جوندەلسە، بيىل كۇردەلى جوندەۋ اياسىندا 23 اۋلا قايتا جاڭعىرتىلدى. سونىمەن قاتار، «حالىق قاتىساتىن بيۋدجەت» باعدارلاماسى اياسىندا 41 اۋلانى جانە 16 جاياۋ جۇرگىنشى ايماعىن قامتيتىن 57 جوبا جۇزەگە اسىرىلدى.
كەلەسى نىسان №1 شاعىن اۋدانداعى «حالىق قاتىساتىن بيۋدجەت» اياسىندا جۇزەگە اسىرىلعان جاڭا سكۆەر بولدى. №20 ءۇيدىڭ ارتىنداعى بوس تۇرعان جەر كادەگە استى. مۇندا جاياۋ جۇرگىنشىلەر ايماعى، قارتتار مەن مۇمكىندىگى شەكتەۋلى جاندارعا ارنالعان ترەناجەرلەر، سونداي-اق ءۇستى جابىلعان ۆوركاۋت ايماعى پايدا بولدى. جاسىل جەلەكتەر مەن ءالپى توبەشىكتەرىن سۋارۋ جۇيەسى ورناتىلىپ، 90 قايىڭ اعاشى وتىرعىزىلدى.
«ءوزىمنىڭ جانە اۋدان تۇرعىندارىنىڭ اتىنان العىس ايتقىم كەلەدى. مۇندا سكۆەر اشىلاتىنىن ەستىگەندە قاتتى قۋاندىق. ءبىز زەينەتكەرلەر كوبىنەسە ۇيدە بولامىز. سپورتپەن اينالىسىپ، ۇزاق ءومىر سۇرگىمىز كەلەدى. سوندىقتان وسىنداي سكۆەر ءبىز ءۇشىن ۇلكەن باقىت»، – دەدى اۋدان تۇرعىنى ۇلمەكەن قوجانازاروۆا.
باسپا ءسوز تۋرىنىڭ سوڭعى نىسانى ەلدەگى العاشقى «جايلى مەكتەپ» جوباسى اياسىندا سالىنعان جاڭا فورماتتاعى مەكتەپ بولدى. №97 مەكتەپ قايتادان سالىندى، سەبەبى بۇرىنعى عيمارات اپاتتى جاعدايدا ەدى.
«جايلى مەكتەپ» جوباسى ەلدەگى اپاتتى عيماراتتاردى جويۋعا، ءۇش اۋىسىمدا وقۋدى ازايتۋعا جانە مەكتەپتەردەگى ورىن تاپشىلىعىن شەشۋگە باعىتتالعان.
جاڭا ءبىلىم ۇياسىندا 600 وقۋشى وقي الادى، وتاندىق ءوندىرىستىڭ زاماناۋي جيھازدارىمەن، جاراتىلىستانۋ پاندەرىنە ارنالعان زەرتحانالارمەن، اكت زالىمەن، كىتاپحانا جانە كوۆوركينگ ايماعىمەن جابدىقتالعان. مەكتەپ اۋماعىندا ۆولەيبول، باسكەتبول، فۋتبول جانە تەننيس الاڭدارى ورنالاسقان. وقۋشىلار مەن پەداگوگتاردىڭ قاۋىپسىزدىگى ءۇشىن بەينەباقىلاۋ، ەسىكتەردى قۇلىپتاۋ جانە دىبىستىق سيگنالداردى پايدالانۋ جۇيەلەرى ورناتىلعان.
ەكسكۋرسيا بارىسىندا جۋرناليستەرگە روبوتوتەحنيكا كابينەتتەرى، زەرتحانالار، سپورتزال جانە اسحانا كورسەتىلدى. باسپا ءسوز تۋرى اياسىندا اۋدان اكىمى ابزال ەگەمبەردييەۆ مەكتەپ پرەزيدەنتىمەن ۇستەل تەننيسىن وينادى.