پەنسيلۆانيا شتاتى ۋنيۆەرسيتەتىنىڭ عالىمدارى وسىنداي مالىمدەمە جاساعان.
ادام ورگانيزمى دەنە تەمپەراتۋراسىن ءوزى رەتتەپ وتىرۋعا بەيىمدەلگەن.
تەوريالىق تۇرعىدان تۇسىندىرسەك ول سىرتقى فاكتورلارعا تاۋەلسىز. ءبىراق پەنسيلۆانيا ۋنيۆەرسيتەتىنىڭ عالىمدارى ىستىق كۇننىڭ ادامعا كەرى اسەرىن انىقتاعان، دەپ حابارلايدى Almaty-akshamy.kz.
24.kz تاراتقان اقپاراتقا ساي، عىلىمي تاجىريبەگە 24 ەرىكتى قاتىستى. ولار ارنايى ورىندا ءتۇرلى تەمپەراتۋرالىق جاعدايدا باقىلاۋدا بولدى. سىناپ باعاناسى 35 گرادۋستان اسقاندا ادامنىڭ ىشكى تەمپەراتۋراسى توقتاۋسىز كوتەرىلە باستايدى. دەمەك ۇزاق ساقتالاتىن ىستىقتىڭ ادام دەنساۋلىعىنا زيانى بار. زەرتتەۋ قورىتىندىلارى سىناپ باعاناسى 31 گرادۋسقا جەتكەندە-اق دەنساۋلىعى مىقتى جاس ادامنىڭ دەنە تەمپەراتۋراسىنىڭ ءوزى كوتەرىلىپ ىسي باستايتىنىن كورسەتىپ وتىر.
بۇل دەرەكتەر ەۋروپاداعى بىلتىرعى ىستىقتا ءولىم-جىتىمنىڭ نەلىكتەن كوبەيگەنىن تۇسىندىرەدى. ول كەزدە كارى قۇرلىقتا 60 مىڭ ادام كوز جۇمعان ەدى. قايعىلى وقيعانىڭ كوبى يتاليا، يسپانيا جانە گەرمانيادا تىركەلدى. دجون نەرن، اۋا رايىن زەرتتەۋشى عالىم: - ءقازىر عالامدىق تەمپەراتۋرا 1980ء-شى جىلدارداعى كەزەڭمەن سالىستىرعاندا جوعارى. جىل سايىن مي قايناتار ىستىقتىڭ قايتالانۋى ارتىپ كەلەدى. سوندىقتان ءقازىر الەمدە اۋا رايى قالىپتى دەپ ايتۋعا كەلمەيدى.
ال سوڭعى مالىمەتكە سۇيەنسەك، كەيىنگى بىرنەشە اپتادا ەۋروپا، ازيا جانە سولتۇستىك امەريكادا اپتاپ ىستىق ءبىر ۋاقىتتا ورناعان. كاليفورنيانىڭ شولەيتتى دالاسىندا سىناپ باعاناسى 53 گرادۋسقا دەيىن كوتەرىلدى. عالىمداردىڭ بولجاۋىنشا بيىل اۋا تەمپەراتۋراسى رەكوردتىق كورسەتكىشكە جەتىپ تاريحتاعى ەڭ ىستىق جىل تىركەلۋى مۇمكىن.