نارىقتا جەلدەتكىش پەن اۋا باپتاعىشتار قىمباتتاعان. سەبەبى سۇرانىس بار جەردە باعانىڭ دا شارىقتايتىنى بەلگىلى.
اۋا باپتاعىشتاردىڭ بارلىعى دەرلىك كورشى قىتايدا قۇراستىرىلادى. برەند ۇلگىلەرى سان ءتۇرلى بولعانىمەن، فۋنكسيونالدىق تۇرعىدا بىر-بىرىنەن ايتارلىقتاي ايىرماشىلىعى جوق، دەپ حابارلايدى Almaty-akshamy.kz 24.kz-كە سىلتەمە جاساپ.
پاتەرىڭىز بەن كەڭسەڭىزدىڭ كەڭدىگىنە قاراي جۇيەنىڭ قۋاتتىسىن تاڭداپ بەرەدى. كارتينا ءپىشىندى ديزاينەرلىك ۇلگىلەرىنە دەيىن بار. ءبىراق ولاردىڭ باعاسى جارتى ملن تەڭگەدەن باستالادى.
تەمىرلان ارينوۆ، ساتۋشى:
– ۇيىندە بالاسى نەمەسە قارياسى بار وتباسىلى ادامدار ءجيى كەلەدى. ءقازىر ىستىق اۋا رايىندا تىنىسى تارىلىپ جۇرگەن ازامات كوپ. بارلىق كليەنتتىڭ ءوتىنىشى مەن سۇرانىسىن تىڭداپ، وزدەرىنە ىڭعايلىسىن كورسەتەمىز. كوبى ساپاعا جانە دىبىسىنىڭ تىنىشتىعىنا ءمان بەرەدى.
جەلدەتكىش – قان قىسىمى جوعارى جاندارعا تاپتىرماس قۇرال. ويتكەنى ولار جاز ايلارىندا كولەڭكەدەن شىعا الماي ءبىراز ابىگەرگە تۇسەدى. بۇل جاعدايعا ءاتۇستى قاراۋعا بولمايدى. سەبەبى دەنساۋلىققا، ءتىپتى ومىرگە ءقاۋىپ توندىرەدى. تاعى سىرتتان ىشكە تەرلەپ كىرۋ، ارتىنشا بىردەن كونديسيونەر قوسۋ نەمەسە قۇرىلعىنىڭ ىشكى سۇزگىشىن ۋاقتىلى تازارتپاۋ – ءتۇرلى دەرتكە اكەلۋى مۇمكىن. مۇنى كوپشىلىك بىلە بەرمەيدى. بۇل رەتتە دارىگەرلەر تۇرعىنداردى كۇتىنىپ جۇرۋگە شاقىرادى.
روزاليا لاتىپوۆا، وتولارينگولوگ-دارىگەر:
– كەشە كابينەتىمە 4 قىز كەلىپ، كونديسيونەر كەسىرىنەن سۋىقتاپ قالعانىن ايتتى. جۇتىنا الماي تاماقتارىن ۇستاپ شاعىمداندى. تەكسەرە كەلە، ولارعا وزگە ادامنان انگينا جۇققانى انىقتالدى. بۇل جەردە كونديسيونەردىڭ قاتىسى شامالى. ونىڭ سۋىعىنا اۋىرىپ قالا بەرەتىن ادامداردىڭ ادەتتە يممۋنيتەتى ءالسىز كەلەدى. اعزاسىنان تولىق شىعا قويماعان دەرتتى جەلدەتكىش قوزدىرىپ جىبەرەتىنى راس. سوندىقتان ساقتانۋ كەرەك.
كونديسيونەردى تىم ۇزاق جانە دۇرىس پايدالانباعان كەزدە ىشىنە شاڭ-توزاڭ جينالىپ، ميكروبتار مەن باكتەريالار پايدا بولادى. سالدارىنان ءفيلترى مەن ىشكى قابىرعالارى كوگەرىپ كەتەدى. مۇنداي كەزدە قۇرىلعىنى شۇعىل سەرۆيستىك ورتالىقتارعا تاپسىرعان ءجون ەكەنىن ەسكەرتەمىز. نەگىزى تازارتۋ جانە ىشىندەگى فريون سۇيىقتىعىن اۋىستىرۋ جىلىنا ءبىر مارتە جۇرگىزىلۋى كەرەك.