اتىراۋداعى كىسى ءولتىرۋ دەرەگى تۋرالى اقپارات قوعامدا رەزونانس تۋدىرعانى حاق. قىزدىڭ ولىمىنە سەبەپكەر بولعان قاسكويلەردىڭ ارەكەتىن پوليسيا قالاي اشكەرەلەدى، جەدەل ۋاكىلدەر كۇدىكتىلەردى قالاي قۇرىقتادى، تەرگەۋشىلەر بۇل ءىستى قالاي اشتى؟ تولىعىراق Polisia.kz ماتەريالىندا، - دەپ حابارلايدى aqshamnews.kz ءتىلشىسى.
23 جاستاعى يانا لەگكوديموۆا 2024 جىلعى 18 قازاننان 19-نا قاراعان ءتۇنى ولتىرىلگەن. قىزدىڭ دەنەسى تەك سەگىز اي وتكەن سوڭ جايىق وزەنىنىڭ جاعاسىنان تابىلدى.
"ءبىرىنشى ادام جوعالۋ فاكتىسىمەن ءىس تىركەلدى. حابار تۇسكەن بويدا ءبىز ونى ىزدەۋگە كىرىستىك. ءبىرقاتار جۇمىستار اتقارىلدى. ادام ۇرلانعانى جونىندە مالىمەتتەر جيناقتالعان سوڭ ءىستى ادام ۇرلاۋ دەرەگى بويىنشا جۇرگىزدىك. ودان سوڭ ءىس كىسى ءولتىرۋ دەرەگىنە وزگەرتىلدى"، - دەدى اتىراۋ وبلىسى كريمينالدىق پوليسيا باسقارماسىنىڭ ءبولىم باستىعى ەرلان قۇسايىنوۆ.
پوليسياعا حابار 20 قازان كۇنى قىزدىڭ اناسىنان ونىڭ حابار-وشارسىز كەتكەنى جونىندە تۇسكەن. ءتارتىپ ساقشىلارى يانانىڭ ءتۇر-سيپاتىنا، ەرەكشەلىكتەرىنە قاراي سۇراۋ سالىپ، ىزدەستىرۋ جۇمىستارىن جۇرگىزگەن.
"ءبىز ونىڭ ۇيدەن شىققان ساتىنەن باستاپ جۇرگەن باعىتىن قالپىنا كەلتىرە باستادىق. كامەرالار قىز مىنگەن اق ءتۇستى كولىكتى كورسەتتى. جانىندا ەسىكتى ۇستاپ تۇرعان ەكىنشى ەر ادام بولعان. كەيىن ول دا اۆتوكولىككە وتىرعان. ودان سوڭ ولار تالدىكولگە قاراي باعىت العان"، - دەدى اتىراۋ وبلىسى پد تەرگەۋ باسقارماسىنىڭ اسا ماڭىزدى ىستەر جونىندەگى تەرگەۋشىسى تەمىرحان حاجمۇراتوۆ.
وقيعانىڭ جاي حابار-وشارسىز كەتكەن ادام تۋرالى ەمەس، قىلمىستىق سيپاتى بارىن جەدەل ۋاكىلدەر انىقتادى. قالاداعى بەينەكامەرالاردىڭ جازبالارى قارالىپ، كۇدىكتى كولىكتىڭ ءجۇرۋ باعىتى تەكسەرىلەدى. وسىلايشا قىزدى الىپ كەتكەن ەكى جىگىت انىقتالادى. ءبىرى قىلمىستى ءوز قولىمەن جاساسا، ەكىنشىسى وعان ءىزىن جاسىرۋعا كومەكتەسكەن.
"كۇدىكتىلەر ەكى كۇننەن كەيىن ۇستالدى. ءبىرى قۇرمانعازى اۋدانىنا كەتىپ ۇلگەرگەن، ەكىنشىسى كولىكتى جۋاتىن ورىنعا اپارىپ، ىزدەردى جانە مارقۇمنىڭ تەلەفونىن جويعان"، - دەدى تەرگەۋشى حاجمۇراتوۆ.
ايعاقتاردىڭ جويىلۋىنا قاراماستان، پوليسيا قىزمەتكەرلەرى ءىستى اشتى. تەرگەۋ ماتەريالدارىنا سايكەس، حايرجانوۆ كولىكتىڭ ىشىندە يانانى تۇنشىقتىرعان، ال دوسى كاتيموۆ قىزدى قاشىپ كەتپەسىن دەپ ەسىكتى ۇستاپ تۇرعان. بۇدان كەيىن ولار دەنەنى قالا سىرتىنا اپارىپ، وزەنگە لاقتىرعان.
"الدىمەن ءبىز حايرجانوۆتى انىقتادىق. ونىڭ جاۋابى بويىنشا ەكىنشى كۇدىكتى كاتيموۆتى تاپتىق. كۇدىكتىلەر ۇستالىپ، ءبىراق ءمايىتتىڭ تابىلماعانى مەنىڭ تاجىريبەمدە العاش رەت بولدى. سوعان قاراماستان كۇدىكتىنىڭ ءسوزى بويىنشا قىلمىس بولعان ورىندى انىقتادىق"، - دەدى ەرلان قۇسايىنوۆ.
قىلمىسكەر مەن مارقۇم ءبىر ۋنيۆەرسيتەتتە وقىعان جانە ءبىرىن-بىرى 2022 جىلدان بەرى بىلگەن. قىز-جىگىت رەتىندە قارىم-قاتىناستا بولعان. قاسكويلەر بۇرىن-سوڭدى سوتتى بولماعان، قانداي دا ءبىر ەسەپتە تۇرماعان. جەدەل ۋاكىلدىڭ ايىتۋىنشا، مۇنداي جاعدايلاردا ۇساق-تۇيەكتىڭ ءوزىن ەسكەرۋ ماڭىزدى.
"قىلمىس تىركەلگەن ۋاقىتتا جەدەل ۋاكىل ۇساق تۇيەك ءمان-جايلارعا نازار اۋدارادى. ونى ەسكەرمەسەڭ، قىلمىس اشىلماي قالۋى مۇمكىن. ادامنىڭ سويلەگەنىنە نازار اۋدارامىز. پسيحولوگيالىق جاعدايىنا ءمان بەرەمىز. كۇدىكتىنى سويلەتۋگە تىرىسامىز"، - دەيدى جەدەل ۋاكىل.
قىلمىستىڭ جاسالۋىنا يانانىڭ حايرجانوۆتىڭ باسقا قىزبەن كەزدەسىپ جۇرگەنىن جانە وعان ۇيلەنبەك ەكەنىن ءبىلىپ قويۋى، قالىڭدىعىنا شىندىقتى ايتامىن دەپ وقتالۋى تۇرتكى بولعان. تەرگەۋشىنىڭ ايتۋىنشا، باستى كۇدىكتى اۋەلدە تەرگەۋدى شاتاستىرۋعا تىرىسقان. الايدا ءتارتىپ ساقشىلارى تاكتيكانى وزگەرتىپ، قىلمىسكەردىڭ جاۋاپكەرشىلىكتەن جالتارۋىنا جول بەرمەدى.
"سوت سانكسياسى بويىنشا ءبىز ولاردىڭ پاراقشالارىن تەكسەردىك. حات الماسۋ بارىسىندا ولار كىسى ءولتىرۋ جوسپارىن تالقىلاعان. سونداي-اق عالامتورداعى ىزدەۋ جۇيەسىندە قازاقستاندا ادام ءولتىرۋ ءۇشىن قانداي جاۋاپكەرشىلىك قاراستىرىلاتىنى جانە بەينەباقىلاۋ كامەرالارىنداعى جازبالار قانشا ۋاقىت ساقتالاتىنى تۋرالى سۇراقتار بولعان"، – دەدى تەرگەۋشى تەمىرحان حاجمۇراتوۆ.
پوليسيا قىزمەتكەرلەرى بارلىق قاجەتتى پروسەسستەردى جۇرگىزىپ، دالەلدەمەلەردى جيناقتادى. بۇگىندە قوس كۇدىكتى دە جاۋاپقا تارتىلدى. ەكەۋى دە ءومىر بويىنا باس بوستاندىعىنان ايىرىلدى.