اتىراۋ وبلىسىنىڭ قىزىلقوعا اۋدانىندا توتەنشە جاعداي جاريالاندى

ويىل وزەنىندە سۋ دەڭگەيى كوتەرىلدى.

اتىراۋ وبلىسىنىڭ قىزىلقوعا اۋدانىندا توتەنشە جاعداي جاريالاندى، دەپ حابارلايدى Almaty-akshamy.kz قازاقپاراتقا سىلتەمە جاساپ.

وبلىستىق توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنشە، بۇعان ويىل وزەنىندە سۋ دەڭگەيىنىڭ كوتەرىلگەنى سەبەپ بولعان. بۇدان بۇرىن ويىل سۋىنىڭ كوتەرىلۋىنە بايلانىستى بوگەت سالىنعانىن جازعان بولاتىنبىز. كەيىن اۋىلدى سۋ تاسقىنىنان قورعاۋ ءۇشىن كولىك جولى جىرىلدى.

«اۋداندىق توتەنشە جاعدايلار جونىندەگى كوميسسيانىڭ جوسپاردان تىس وتىرىسى ءوتىپ، ويىل وزەنىنىڭ ارناسىنان تاسۋىنا بايلانىستى قىزىلقوعا اۋدانىندا توتەنشە جاعداي جاريالاندى. توتەنشە جاعدايلاردىڭ الدىن الۋ ماقساتىندا 8(71238)2-17-84، 101، +7 7771935380 Call-ورتالىققا قوڭىراۋ شالۋعا بولادى»، - دەپ ءمالىم ەتتى دەپارتامەنتتىڭ باسپا ءسوز قىزمەتى.

ءقازىر اۋدان ورتالىعى ميالىدان جانگەلدين اۋىلىنا قاتىنايتىن جول جابىلدى. ءقاۋىپ سەيىلگەننەن كەيىن جول قالپىنا كەلتىرىلەدى. اۋدان ورتالىعىن سۋ تاسقىنىنان قورعاۋ ماقساتىندا 300 توننا توپىراق، قۇم تولتىرىلعان 500-دەن استام قاپ قويىلعان.