اتىراۋ وبلىسىندا ەكى اۋداندى قار سۋى باسىپ قالدى

تجد قىزمەتكەرلەرى ارنايى تەحنيكامەن سۋ سورۋ جۇمىستارى جۇرگىزدى

اتىراۋ وبلىسىنىڭ يندەر جانە قىزىلقوعا اۋداندارىن ەرىگەن قار سۋى باسىپ قالدى، دەپ حابارلايدى Almaty-akshamy.kz.

وبلىستىق توتەنشە جاعدايلار دەپارتامەنتىنىڭ قوعاممەن بايلانىس توبىنىڭ مالىمەتىنشە، يندەر جانە قىزىلقوعا اۋداندارىندا ەرىگەن قار سۋىن سورۋ بويىنشا اۆاريالىق-قۇتقارۋ جۇمىستارى جۇرگىزىلىپ جاتىر.

«26 اقپان كۇنى ساعات 16.20-دان يندەر اۋدانى يندەربور كەنتىنىڭ كوشەسىندە ەرىگەن قار 30 سم جەتتى. سونداي-اق جارسۋات اۋىلىنىڭ كوشەلەرىن دە سۋ باسىپ قالدى. سۋ سورۋ جۇمىستارىنا تجد جانە اۋداندىق اكىمدىك قىزمەتكەرلەرى جۇمىلدىرىلدى»، - دەلىنگەن تجد حابارلاماسىندا.

سونداي-اق قىزىلقوعا اۋدانىنا قاراستى ميالى اۋىلىنىڭ قارابالين جانە اققۋوۆ كوشەلەرىندە دە 25-30 سم بولاتىن ەرىگەن قار سۋىن ارنايى سۋ سورۋ تەحنيكاسىمەن اۋىل سىرتىنا شىعارۋ جۇمىستارى جۇرگىزىلدى. بارلىعى 280 م3 سۋ سورىلدى.

ەسكە سالساق، توتەنشە جاعدايلار ءمينيسترى يۋريي يلين بيىل كوكتەمدە اۋا رايىنا بايلانىستى 431 مىڭنان استام ادام تۇراتىن 285 ەلدىمەكەندە سۋ باسۋ ءقاۋپى بار ەكەنىن مالىمدەگەن بولاتىن.