قازاقستان ينتەرنەت قاۋىمداستىعىنىڭ باسشىسى شاۆكات سابيروۆ «Facebook» پاراقشاسىندا «mediametrics.kz» سەرۆيسىنىڭ ينديكاتورلارى ارقىلى جەلىلىك ب ا ق پەن الەۋمەتتىك جەلىلەردەگى اقپارات اعىنىن باقىلاۋ ناتيجەلەرىن جاريالادى.
«ءار 5 سەكۋند سايىن ءبىز 1500-دەن استام ونلاين باق-تان مالىمەتتەر الامىز. اتوم ەلەكتر ستانسياسىن سالۋ جونىندەگى رەفەرەندۋم تاقىرىبى بويىنشا قازاقستاننىڭ اقپاراتتىق ءورىسىن تالدادىق»، – دەلىنگەن جازبادا.
ش. سابيروۆ 16-22 قىركۇيەك ارالىعىندا جۇرگىزىلگەن اپتالىق مونيتورينگ ناتيجەلەرىن ۇسىندى. تالداۋعا «اتومدىق ەلەكتر ستانسياسى»، «ەنەرگيا تاپشىلىعى»، «اتومدىق ەنەرگيا»، «بەيبىت اتوم»، «يادرولىق رەاكتور»، «رەفەرەندۋم»، «ۇلكەن اۋىلى» سياقتى ىزدەۋ كىلت سوزدەرى قولدانىلعان.
سەرۆيس ناتيجەسىندە جەلىلىك باق-تا 3 مىڭنان استام جاريالانىم تىركەلىپ، ولاردىڭ 80%-ى بەيتاراپ، 18%-ى وڭ، ال 2%-ى تەرىس سيپاتتا بولعان.
الەۋمەتتىك جەلىلەردە كورسەتكىشتەر الدەقايدا جوعارى: 80 مىڭنان استام ەسكەرتپە تىركەلىپ، ولاردىڭ 82%-ى بەيتاراپ، 16%-ى وڭ، ال 2%-ى تەرىس بولعان.
اۆتور جاريالانىمدا ينتەرنەتتەگى باق-تا تالقىلاناتىن نەگىزگى تاقىرىپتاردى اتاپ كورسەتتى:
- ەلەكتر ەنەرگياسىنىڭ تاپشىلىعى؛
- اەس جۇمىسىنىڭ سەنىمدىلىگى مەن قاۋىپسىزدىگى؛
- ەلدىڭ ەنەرگەتيكالىق قاجەتتىلىكتەرىن قاناعاتتاندىرۋ (ورتا جانە ۇزاق مەرزىمدى پەرسپەكتيۆادا)؛
- ەكونوميكانىڭ، عىلىمنىڭ دامۋىنا جانە ازاماتتاردىڭ ءومىر ءسۇرۋ ساپاسىن جاقسارتۋعا اسەر ەتۋ؛
- ەكونوميكالىق ءوسۋ ءۇشىن ەلدىڭ ەنەرگەتيكالىق الەۋەتىن ارتتىرۋ؛
- «اتوم ەنەرگەتيكاسىنىڭ» جاڭا سالاسىن قالىپتاستىرۋ جانە قۇرۋ؛
- يادرولىق مەديسينانىڭ دامۋى.
زەرتتەۋ ناتيجەسىندە ش. سابيروۆ اەس تاقىرىبى مەن رەسپۋبليكالىق شتاب قىزمەتىنىڭ كەڭىنەن قامتىلعانىن (ينتەرنەتتەگى باق-تا ايتىلعانداردىڭ 30%-دان استامى)، سونداي-اق ساراپشىلار، قوعام بەلسەندىلەرى، دەپۋتاتتار مەن بەلگىلى تۇلعالاردىڭ يادرولىق ەنەرگەتيكانى قولداۋداعى بەلسەندىلىگىن اتاپ ءوتتى. سونىمەن قاتار، باسقا تاقىرىپتار اراسىندا ارميا رەفورماسى، قۇقىق قورعاۋ ورگاندارىنداعى وزگەرىستەر، بانكتەردىڭ پروبلەمالارى جانە سۋيسيد ماسەلەلەرى دە تالقىلانعان.