Almaty-akshamy.kz سايتىندا بۇگىن جارىق كورگەن جاڭالىقتارعا شولۋ – كۇن كەرۋەنى
اتلەتتەر وليمپياداعا بارمايدى
1996 جىلدان بەرى بارلىق وليمپياداعا قاتىسقان اتلەتتەر پاريجگە جولداما الا المادى. اۋىر اتلەتيكادان قازاقستان قۇراماسى العاش رەت وليمپيادا ويىندارىنا قاتىسپايدى. قازاقستاندىق اۋىر اتلەتتەر پاريجدە وتەتىن وليمپيادا ويىندارىنا جولداما يەلەنە المادى.
جالعان ءسوز جارعا جىقتى
«جاڭاوزەندە جول جابىلدى» دەپ الاڭداۋشىلىق سيپاتتا جالعان اقپاراتتى الەۋمەتتىك جەلى ارقىلى تاراتقان جاڭاوزەندىك جازالاندى. ول ق ر اكىمشىلىك قۇقىق بۇزۋشىلىق تۋرالى كودەكسىنىڭ 456 بابىنىڭ 3 بولىگىنە ساي اكىمشىلىك جاۋاپكەرشىلىككە تارتىلىپ وتىر.
بۇدان بۇرىن مەملەكەت باسشىسى توقايەۆ بۇقارالىق اقپارات قۇرالدارىنا، بەلسەندى ازاماتتارعا جانە بلوگەرلەرگە جۇرتتى دۇربەلەڭگە سالاتىن جالعان اقپاراتتاردى تاراتپاۋ قاجەت ەكەنىن ايتقان بولاتىن.
ەڭبەكمين وتەماقى تولەمەيدى
ق ر ەڭبەك جانە حالىقتى الەۋمەتتىك قورعاۋ مينيسترلىگى سۋ تاسقىنىنان زارداپ شەككەندەرگە وتەماقى تولەيتىنى تۋرالى مەسسەندجەرلەر مەن الەۋمەتتىك جەلىلەردە تاراتىلىپ جاتقان اقپارات شىندىققا جاناسپايدى.
مەملەكەت باسشىسىنىڭ تاپسىرماسىنا سايكەس سۋ تاسقىنىنان زارداپ شەككەن قازاقستاندىقتارعا جەرگىلىكتى اتقارۋشى ورگاندار ءبىرجولعى تولەم تۇرىندە كومەك كورسەتەدى. ولاردىڭ مولشەرى ءار وڭىردە كەلتىرىلگەن ماتەريالدىق زالالدى ەسەپتەۋ ءۇشىن قۇرىلعان ارنايى كوميسسيالاردىڭ شەشىمى بويىنشا جەكە-جەكە بەلگىلەنەتىن بولادى.
مۇحيتتى دا لاستادىق
اۆستراليا مەن كانادا عالىمدارى الەمدىك مۇحيت تۇبىنە شوككەن پلاستيك مولشەرىن ەسەپتەدى. عالىمداردىڭ ەسەبىنشە، مۇحيت تۇبىنە 11 ملن تونناعا دەيىن پلاستيك شوككەن. ولاردىڭ جارتىسى تۇڭعيىقتا جاتىر. بۇل زەرتتەۋ ءوز كەزەگىندە پلاستيكپەن لاستانۋدىڭ سالدارىمەن كۇرەسۋگە ءارى ونىڭ قورشاعان ورتاعا زيانىن انىقتاۋعا كومەكتەسۋى مۇمكىن.
3 745 جەر ءۇي سۋ استىندا قالدى
تجم ازاماتتىق قورعانىس جانە اسكەري بولىمدەر كوميتەتىنىڭ اعا وفيسەرى ەراسىل سايپاشتىڭ ايتۋىنشا، سۋ تاسقىنى باستالعالى بەرى 75 982 ادام، ونىڭ ىشىندە 18 681 بالا قۇتقارىلعان. تارتىلعان اۋە كەمەلەرىنىڭ كومەگىمەن 2 811 ادام، ونىڭ ىشىندە 865 بالا قۇتقارىلدى. ۋاقىتشا ورنالاسۋ پۋنكتتەرىنە 7 مىڭنان استام ادام، ونىڭ ىشىندە 2 794 بالا ورنالاستىرىلدى. 69 971 جانۋار قاۋىپسىزدىك جەرگە ايدالدى. زارداپ شەككەن وڭىرلەرگە 126 توننا گۋمانيتارلىق كومەك جەتكىزىلدى. بىرلەسكەن كۇشتەرمەن 7،7 ملن استام تەكشە مەتر ەرىگەن قار سۋى سورىلدى. 993 مىڭ قاپشىق جانە 982 مىڭ توننا ينەرتتى ماتەريال توسەلدى. 1 739 تۇرعىن ءۇي مەن 1 743 اۋلا اۋماعىنان سۋ بۇرىلدى.
الماتىدان اتىراۋعا كومەك جىبەرىلدى
كەشە اتىراۋ وبلىسىندا سۋ تاسقىنىنا بايلانىستى تابيعي سيپاتتاعى توتەنشە جاعداي رەجيمى جاريالاندى. زارداپ شەككەن ايماققا الماتى قالاسى اكىمى اپپاراتىنىڭ قۇتقارۋ قىزمەتىنىڭ كۇشىمەن گۋمانيتارلىق كومەك جىبەرىلدى.
29 ناۋرىزدان باستاپ قالادا المالى اۋدانىنىڭ كوممۋنالدىق ورتالىعى بازاسىندا اشىلعان قابىلداۋ پۋنكتى جۇمىس ىستەيدى. كۇن سايىن الماتىلىقتار قاجەتتى زاتتاردى اكەلىپ، تابيعي اپاتتان زارداپ شەككەن وڭىرلەرگە كومەك كورسەتۋگە ۇلەستەرىن قوستى. قالا تۇرعىندارى، كاسىپكەرلەر، جاستار قاجەتتى كومەكتى جيناۋعا بەلسەنە قاتىستى. 6 كۇندە 10 تونناعا جۋىق گۋمانيتارلىق كومەك جينالدى.
2 000 000 تەڭگەلىك كوستيۋم
الماتى قالاسىندا «DAULETTEN قايىرىمدىلىق قورى» ۇيىمداستىرعان قايىرىمدىلىق كەشتە ديماش قۇدايبەرگەننىڭ كوستيۋمى اۋكسيوندا 2 000 000 تەڭگەگە ساتىلدى.
بۇل كوستيۋمدى تانىمال ءانشى اللا پۋگاچيەۆانىڭ ماسكەۋدە وتكەن مەرەيتويىنا وراي ۇيىمداستىرىلعان «پوداروك دليا اننى» اتتى شىعارماشىلىق كەشىندە كيگەن. وندا ديماش يگور كرۋتويدىڭ «ليۋبوۆ، پوحوجايا نا سون» ءانىن ورىندادى. كوستيۋمنىڭ ديزاينەرى – Atelier Leka. 2 000 000 تەڭگەلىك كوستيۋمدى قازاقستاندىق كاسىپكەر، قارجىلىق ساۋاتتىلىق بويىنشا مەنتور ەركەبۇلان ءارىپباي ساتىپ الدى.
«الماتى – ءبىزدىڭ ورتاق ءۇيىمىز»
بۇگىن قالامىزدا وسىنداي اتپەن ناۋقان باستالدى. 8 ءساۋىر مەن 8 مامىر ارالىعىندا وتەتىن ناۋقانعا الماتىنىڭ ءاربىر تۇرعىنى مەن قوناعى قاتىسا الادى.
«الماتى – ءبىزدىڭ ورتاق ءۇيىمىز» ناۋقانىنىڭ باستى ماقساتى – قالالىق ينفراقۇرىلىمعا ۇقىپتى قاراۋ قۇندىلىعىن قالىپتاستىرۋ، حالىق اراسىندا جوعارى ازاماتتىق جاۋاپكەرشىلىك پەن ەكولوگيالىق مادەنيەتتى تاربيەلەۋ، جەكە ەكولوگيالىق باستامالاردى قولداۋ مەن ىسكە اسىرۋعا جاعداي جاساۋ.