اتاقتى قىلمىستىق توپتىڭ مۇشەلەرى قولعا ءتۇستى

سوتقا دەيىنگى تەرگەۋ امالدارى جۇرگىزىلۋدە.

«ايشۋاق-جانتۇگەل» ۇقت-نىڭ مۇشەلەرىن ۇستاۋ بويىنشا ارنايى وپەراسيا ءوتتى، دەپ حابارلايدى Almaty-akshamy.kz Polisia.kz-كە سىلتەمە جاساپ.

26 ناۋرىزدا قازاقستان رەسپۋبليكاسى ىشكى ىستەر مينيسترلىگى ۇقك جانە بپ-مەن بىرلەسىپ، سونداي-اق، ارنايى جاساق بولىمشەسىنىڭ قاتىسۋىمەن الماتى قالاسىندا جانە الماتى وبلىسىندا ارنايى وپەراسيا بارىسىندا بۇرىن بىرنەشە رەت قىلمىستىق جاۋاپكەرشىلىككە تارتىلعان «ايشۋاق-جانتۇگەل» ۇيىمداسقان قىلمىستىق توبىنىڭ مۇشەلەرىن ۇستادى.

جۇرگىزىلگەن ارنايى وپەراسيانىڭ ناتيجەلەرى بويىنشا ۇستالعانداردان ەكى «كالاشنيكوۆ» اۆتوماتى، بەس اڭشىلىق كەلتە مىلتىق، ەكى جاۋىنگەرلىك تاپانشا، «كالاشنيكوۆ» پنيەۆماتيكالىق اۆتوماتى، «ف-1» قورعانىس قول گراناتاسى، وق وتپەيتىن ەكى كەۋدەشە، اڭشىلىق پىشاق، ءتۇرلى كاليبرلى 350-دەن استام ءوق-دارى، سونداي-اق، 5700 اقش دوللارى جانە 107 مىڭ تەڭگە سوماسىنداعى اقشالاي قاراجات تاركىلەندى.

قازىرگى ۋاقىتتا ۇستالعان ادامداردىڭ وزگە دە اۋىر جانە اسا اۋىر قىلمىستارعا، ونىڭ ىشىندە قاڭتار ايىنىڭ باسىندا ورىن العان جاپپاي تارتىپسىزدىك كەزىندە جاسالعان قىلمىستارعا قاتىستىلىعى تەكسەرىلۋدە.

ۇيىمداسقان قىلمىستىق توپتىڭ باسقا دا قاتىسۋشىلارىن انىقتاۋ جانە ۇستاۋ بويىنشا جۇمىس جالعاسۋدا. ۇستالعان ادامدارعا قاتىستى «قاماۋدا ۇستاۋ» بۇلتارتپاۋ شاراسى تاڭدالدى.