ءماجىلىس دەپۋتاتى ماقسات تولىقباي جالعان اتاق پەن مەدال تاراتۋدى "ءقاۋىپتى دەرتكە" تەڭەپ، ۇكىمەتتەن ناقتى ءارى قاتاڭ شارالار قابىلداۋدى تالاپ ەتتى. دەپۋتات پرەمەر-مينيستردىڭ ورىنباسارى – مادەنيەت جانە اقپارات ءمينيسترى ايدا بالايەۆا اتىنا جولداعان دەپۋتاتتىق ساۋالىندا ماراپات ينستيتۋتىنىڭ بەدەلى قۇنسىزدانىپ بارا جاتقانىن مالىمدەدى، - دەپ حابارلايدى aqshamnews.kz ءتىلشىسى.
ءماجىلىس مىنبەرىندە كوتەرىلگەن دەپۋتاتتىق ساۋالدا كەيىنگى جىلدارى ەلدە اتاق پەن ماراپاتتىڭ "بيزنەستىك تاۋارعا" اينالعانى قاتاڭ سىنعا الىندى. دەپۋتاتتىڭ ايتۋىنشا، ءاتى-جونى بەلگىسىز قوعامدىق ۇيىمدار ءتۇرلى وردەن-مەدال مەن اتاقتاردى اشىق نەمەسە جاسىرىن تۇردە ساتىپ، ونى سالتاناتتى شوۋعا اينالدىرعان.
"اتاعى جوق، مەدال الماعان كىم قالدى؟ اتاققۇمارلىق كادىمگى دەرتكە اينالىپ بارادى. ماراپات پەن اتاق – بازاردا ساتىلاتىن سۋۆەنير سياقتى"، – دەدى دەپۋتات.
ساۋالدا كەلتىرىلگەن دەرەكتەرگە سۇيەنسەك، "قازاقستاننىڭ قۇرمەتتى ازاماتى"، "قازاقستاننىڭ ەڭبەك سىڭىرگەن قىزمەتكەرى"، "ۇلت ۇستازى" سياقتى اتاقتار 20 مىڭنان 100 مىڭ تەڭگەگە دەيىنگى ارالىقتا "باعالانادى". اقشاسىن تولەگەن ادامعا مەدال، وردەن، كۋالىك جانە ساحنالىق ماراپاتتاۋ ءراسىمى قوسا ۇسىنىلادى.
"وزدەرى ءماز. شىن مانىندە نە اتاق الىپ جاتقانىن وزدەرى دە بىلمەيدى. الەۋمەتتىك جەلىگە سالىپ، قىزۋى باسىلعانشا تويلاۋمەن الەك"، – دەپ اتاپ ءوتتى ماقسات تولىقباي.
دەپۋتات بۇل قۇبىلىستىڭ ەڭ ءقاۋىپتى تۇسى – جالعان ماراپاتتاردىڭ ءبىلىم بەرۋ سالاسىنا ەنۋى ەكەنىن باسا ايتتى. ونىڭ ايتۋىنشا، بۇگىندە ءمۇعالىمنىڭ كاسىبي دەڭگەيى ءبىلىم ساپاسىمەن ەمەس، العىس حات پەن مەدال سانى ارقىلى ولشەنەتىن جاعداي قالىپتاسقان.
"بۇل – ءبىلىم جۇيەسىنىڭ ىرگەتاسىن شايقالتاتىن اسا ءقاۋىپتى قۇبىلىس. مۇعالىمدەر وقۋشىعا ءبىلىم بەرۋدە ەمەس، ماراپات جيناۋدا بىر-بىرىمەن جارىسا باستادى"، – دەدى ول.
دەپۋتات حالىقارالىق تاجىريبەگە دە توقتالىپ ءوتتى. كوپتەگەن دامىعان ەلدەردە مەملەكەتتىك ماراپاتتار زاڭمەن قاتاڭ قورعالاتىنىن، كريتەرييلەرى ناقتى ءارى ءراسىمى اشىق جۇرگىزىلەتىنىن اتاپ ءوتتى. ال قازاقستاندا كەز كەلگەن ادام قوعامدىق ۇيىم قۇرىپ، اتاق تاراتا الاتىن جاعداي بار ەكەنىن سىنعا الدى.
وسىعان بايلانىستى دەپۋتات ۇكىمەتكە ءبىرقاتار ناقتى ۇسىنىس جولدادى:
- 2025 جىلعى ماۋسىمدا قابىلدانعان زاڭنامالىق وزگەرىستەردىڭ تولىق ءارى ءتيىمدى ورىندالۋىن قامتاماسىز ەتۋ؛
- قوعامدىق ماراپاتتاردى زاڭسىز تاراتۋ فاكتىلەرى بويىنشا اكىمشىلىك جانە وزگە دە قۇقىقتىق شارالاردى جۇيەلى قولدانۋ؛
- مەملەكەتتىك جانە قوعامدىق ناگرادالاردىڭ ءبىرىڭعاي سيفرلىق تىركەلىمىن ەنگىزۋ ارقىلى اشىقتىق پەن باقىلاۋدى كۇشەيتۋ.