رەسەيدىڭ استراحان قالاسىندا قازاقتىڭ قوس ىشەكتى دومبىراسىنا قىزىعۋشىلىق تانىتاتىندار كوبەيگەن.
ءتىپتى نيەت بىلدىرۋشىلەرگە ارنالىپ، سول وڭىردەگى ونەر جانە مادەنيەت كوللەدجىندە ارنايى وقۋ سىنىبى دا اشىلعان. ءارى قانداستار كوپ شوعىرلانعان وڭىردەگى ىرگەلى ءبىلىم ورداسىندا قازاق مادەنيەتى مەن ءسالت-داستۇرىن ناسيحاتتايتىن ورتالىق جاساقتالىپ، ءوز جۇمىسىن باستادى، دەپ حابارلايدى Almaty-akshamy.kz Qazaqstan.tv سايتىنا سىلتەمە جاساپ.
قازاقتىڭ دەگدار ءداستۇرى مەن بىرەگەي ءسالت-داستۇرىن كەڭىنەن ناسيحاتتايتىن قوعامدىق ورتالىق 31 جىل بۇرىن استراحاندا اشىلدى. بۇل وسىندا تۇراتىن 150 مىڭنان استام قانداسقا اينىماس باعدار بولدى. باستاما كەڭىنەن قانات جايىپ، بۇگىندە جاڭا دەڭگەيگە كوتەرىلگەن. ەندى ۇلتتىق قۇندىلىقتان شەت قالعان جاستار ءۇشىن تەحنيكالىق ۋنيۆەرسيتەت جانىنان اۋديتوريا ىسكە قوسىلدى.
"وسى فاكۋلتاتيۆكە جاستارمەن قاتار، ءوزىنىڭ ءتىلىن، ءداستۇرىن بىلگىسى كەلەتىن ۇلكەن ادامدار، بالالار كەلەدى. سونىڭ ىشىندە شەتەلدىڭ باسقا ۇلت وكىلدەرى دە وقيدى"، - قازاق ءتىلى ءمۇعالىمى ءاليا عۇماروۆا.
استراحانداعى 15 مەكتەپتە قازاق ءتىلى فاكۋلتاتيۆتىك ءپان رەتىندە وقىتىلادى. ساۋات اشۋ كىتاپتارى ابدەن توزعان. سول ءۇشىن باستاۋىش سىنىپ بالالارىنا ارنالعان جاڭا وقۋلىق ازىرلەندى. وقۋلىقتار زامانعا ساي ادىستەرگە نەگىزدەلگەن ءارى ولاردى دايىنداۋ ءۇشىن بىلىكتى ماماندار جۇمىلدىرىلعان.
«ناعىز قازاق – دومبىرا» دەگەن ۇستانىمدى مۇنداعى قانداستار جاقسى تۇسىنەدى. قىزىعۋشىلىق تانىتقان جاستار ونەر كوللەدجىندە ۇلتتىق اسپاپتى كاسىبي دەڭگەيدە مەڭگەرۋگە كوشكەن. «شالقىما» دەپ اتالاتىن وركەستر قۇرىپ، دومبىرانىڭ عاجايىپ مۇمكىندىكتەرىن پاش ەتىپ ءجۇر. تالاي بايقاۋدا جەڭىمپاز اتانىپ، تالعامپاز كورەرمەننىڭ كوزايىمىنا اينالعان.
"ءبىز تەك قانا قازاقتىڭ مۋزىكاسىن ەمەس، شەتەلدىڭ دە مۋزىكسىن وينايمىز. سوسىن قازاقتىڭ فولكلورىن دا كوتەرىپ جاتىرمىز. سۇرانىس كوپ، وبلىستىڭ 15 اۋدانىندا ءاربىر قازاق مەكتەبىندە دومبىرا كلاسى بار"، - دەدى «شالقىما» وركەسترىنىڭ مۇشەسى قايرات قازانبايەۆ.
دومبىرا ۇيرەنەمىن دەۋشىلەر كوپ بولعاسىن، كوللەدج جانىنان ارنايى ۇيىرمە دە اشىلىپتى. وعان 6 جاستان اسقان بالالار قابىلدانادى.