"استانا-ارەنا" سپورت كەشەنى مەن "الاۋ" مۇز سارايىنىڭ اراسىنداعى اتى جوق كوشە ساياحاتشى ماركو پولونىڭ ەسىمىمەن اتالادى. سونداي-اق ەلورداداعى تاعى ەكى كوشەگە جاڭا اتاۋ بەرىلەدى، - دەپ حابارلايدى aqshamnews.kz ءتىلشىسى.
بۇل شەشىم بۇگىن ەلوردا ءماسليحاتىنىڭ سەسسياسىندا قابىلداندى. ءتيىستى ۇسىنىستاردى استانانىڭ تىلدەردى دامىتۋ جانە مۇراعات ءىسى باسقارماسىنىڭ باسشىسى ساكەن ەسىركەپ ۇسىندى.
"قىركۇيەكتە، يتاليا پرەزيدەنتى ەلىمىزگە رەسمي ساپارمەن كەلگەن بولاتىن. سول كەزدەسۋ بارىسىندا مەملەكەت باسشىسى استاناداعى ورتالىق كوشەلەردىڭ بىرىنە ماركو پولونىڭ اتىن بەرۋدى تاپسىرعان ەدى"، – دەدى ول.
كوشە تۇران جانە قابانباي باتىر داڭعىلدارىن جالعايتىن اۋماقتا ورنالاسقان.
ۆيدەو كادرى
بۇدان بولەك، استانادا تاعى ەكى كوشەگە اتاۋ بەرۋ ۇسىنىلدى:
- جوبالىق اتاۋى ە15 كوشەسىنە – مۇحاممەد ءالي دجيننا؛
- جوبالىق اتاۋى ە754 كوشەسىنە – سوفيا اتاۋى بەرىلمەك.
انىقتاما:
مۇحاممەد ءالي دجيننا – مۇسىلمان ساياساتكەر، پاكىستاندا ۇلتتىق مەملەكەتتىلىكتىڭ نەگىزىن قالاۋشى رەتىندە قۇرمەتتەلەدى.
سوفيا – بولگاريانىڭ استاناسى جانە ەڭ ءىرى قالاسى.