قازاقستان گيننەس رەكوردىن ورناتۋدى جوسپارلاپ وتىر. تانىمال پروديۋسسەر ءداۋىت شايحيسلاموۆ ءتۇرلى ۇلت وكىلدەرىنەن تۇراتىن ەڭ ۇلكەن وركەستر قۇرماق، دەپ حابارلايدى Almaty-akshamy.kz Inform.kz-كە سىلتەمە جاساپ.
«بۇعان دەيىنگى «الەم كارتيناسى» جوباسى مەنى شابىتتاندىردى دەسەم دە بولادى. ماتەريالدىق ەمەس رۋحاني جاعىن ايتىپ تۇرمىن. مەيىرىمدىلىكتىڭ مول ەنەرگياسىن العان كەزدە سول ەنەرگيانى وزگەلەرمەن دە بولىسكىڭ كەلىپ تۇرادى. جاڭا جوبا يدەياسى ءبىرازدان بەرى ءپىسىپ جەتىلگەن ەدى. دەگەنمەن، ونىڭ باستالۋىنا قىركۇيەك ايىنىڭ ورتاسىندا قازاقستان ەلورداسىندا الەمدىك جانە ءداستۇرلى دىندەر كوشباسشىلارىنىڭ VII سەزى وتەتىندىگى تۋرالى حابار تۇرتكى بولدى. وسىناۋ جاھاندىق وقيعاعا ريم پاپاسىنىڭ كەلەتىندىگى دە جوسپارلانعان. قازاقستاننىڭ باس قالاسىنا عالامشاردىڭ بارلىق تۇكپىرىنەن ءتۇرلى كونفەسسسيا وكىلدەرى كەلگەن كەزدە ولاردى كوپۇلتتى وركەستردىڭ قارسى الۋىنىڭ سيمۆولدىق ءمانى بار»، - دەدى ءداۋىت شايحيسلاموۆ.
ونىڭ ايتۋىنشا، «الەم مۋزىكاسى» دەپ اتالاتىن جوبا اياسىندا ءبىر ساحنادا ءتۇرلى حالىق پەن ۇلتتىق ەڭ كوپ وكىلى باس قوسىپ، مۋزىكالىق شىعارما ورىندايدى. وسىلايشا، ەڭ كوپۇلتتى وركەستر رەتىندە گيننەستىڭ رەكوردتار كىتابىنا ەنۋ كوزدەلگەن. قازىرگى ۋاقىتتا مۋزىكانتتار worldrecord.kz جوباسىنىڭ رەسمي پاراقشاسىنا ءوتىنىم قالدىرىپ جاتىر.
ءداۋىت شايحيسلاموۆتىڭ سوزىنە قاراعاندا، مۋزىكانتتاردىڭ قانداي شىعارما ورىندايتىنىنا قاتىستى الدىن الا ۋاعدالاستىق بار. ءىس-شارا 6 قىركۇيەكتە بەيبىتشىلىك پەن كەلىسىم سارايىندا وتەتىن بولادى.
«ازىرشە قانشا ادام قاتىساتىندىعىن ايتپايمىن. ويتكەنى، رەكوردتىڭ اسەرى بولماي قالادى. ياعني، سوڭىنا دەيىن، گيننەس رەكوردتار كىتابى وكىلى قاتىسۋشىلاردىڭ ناقتى سانىن ايتقانشا قۇپيا ۇستايمىز»، - دەدى ول.