استانا قالاسىنىڭ باس مەملەكەتتىك سانيتار دارىگەرى ايگۇل شاعالتايەۆا قىزىلشا بويىنشا ەپيدجاعدايدى تالداپ، ۆاكسيناسيانى كۇشەيتۋ جانە قالالىق شتاب وتىرىستارىن اپتا سايىن وتكىزۋ جونىندە ءبىرقاتار تاپسىرما بەردى، دەپ حابارلايدى Aqshamnews.kz ءتىلشىسى.
بەرىلگەن تاپسىرمالار قاتارىندا:
-
18 جاسقا دەيىنگى بالالار مەن جاسوسپىرىمدەردىڭ ەكپە قامتىلۋىن تالداپ، كەلىسىم الىنعاننان كەيىن ەكپە الماعاندارعا قوسىمشا يممۋنداۋ جۇرگىزۋ؛
-
55 جاسقا دەيىنگى مەديسينا قىزمەتكەرلەرىنىڭ ۆاكسيناسيا مارتەبەسىن تەكسەرىپ، ەكپەسى جوق نەمەسە بەلگىسىزدەرگە كەلىسىمىمەن ۆاكسينا سالۋ؛
-
كەلىسىمنەن كەيىن 6 ايدان 10 اي 29 كۇنگە دەيىنگى بالالارعا قوسىمشا ەكپە ەگۋ؛
-
1 جانە 6 جاستاعى نىسانالى توپتاردى قىزىلشا-قىزامىق-پاروتيتكە قارسى ەكپەمەن وڭتايلى دەڭگەيدە قامتۋ؛
-
جوسپارلى تۇردە اۋرۋحاناعا جاتقىزىلاتىن بالالاردى قىزىلشاعا قارسى ەكپەسى بولعان جاعدايدا عانا قابىلداۋ؛
-
قىزىلشا ماسەلەسى بويىنشا اكىمدىك جانىنداعى قالالىق شتاب وتىرىستارىن اپتا سايىن وتكىزۋ.
باس سانيتار دارىگەردىڭ مالىمەتىنشە، سوڭعى ءۇش اپتادا قالادا 403 ادامنان قىزىلشا انىقتالعان، ولاردىڭ 96%-ى 14 جاسقا تولماعان بالالار.