ەلوردادا ەلىمىزدىڭ باس قالاسىنىڭ 25 جىلدىعىنا ارنالعان «استانا –مادەنيەت كەرۋەنى» اسكەري وركەسترلەرىنىڭ I حالىقارالىق اسكەري-مۋزىكالىق فەستيۆالى ءوتىپ جاتىر، دەپ حابارلايدى Almaty-akshamy.kz ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
مەرەكە كۇنى ەسىل جاعالاۋىنداعى جازعى امفيتەاتر ساحناسىندا ازەربايجان، ءۇندىستان، جۇڭگو، رەسەي، تۇركيا، وزبەكستان جانە جاپونيانىڭ اسكەري مۋزىكالىق ۇجىمدارىنىڭ ونەرىن پاش ەتكەن Band Marathon ءوتتى.
فەستيۆالدە قارۋلى كۇشتەردىڭ ۇلتتىق اسكەري-پاتريوتتىق ورتالىعىنىڭ ورتالىق اسكەري وركەسترى، مەملەكەتتىك كۇزەت قىزمەتىنىڭ پرەزيدەنتتىك وركەسترى جانە ۇلتتىق ۇلاننىڭ ۇلگىلى-كورسەتىلىمدى وركەسترى قاتىسادى.
جينالعاندارعا ارناپ قورعانىس ءمينيسترىنىڭ ورىنباسارى گەنەرال-لەيتەنانت سۇلتان كامالەتدينوۆ ءسوز سويلەدى. ول قالا تۇرعىندارى مەن قوناقتارىن استانا كۇنىمەن قۇتتىقتاپ، مۋزىكانتتارعا وسىنداي اۋقىمدى شاراعا قاتىسقانى ءۇشىن ريزاشىلىعىن جەتكىزدى.
– ءبىزدىڭ حالىقارالىق اسكەري وركەسترلەر فەستيۆالى بۇل استانا – بەيبىتشىلىك پەن جاسامپازدىق قالاسى، مادەنيەت پەن حالىقتاردى ءبىر ورتاعا تارتىپ، جاقىنداستىراتىن ورتالىق ەكەنىنىڭ جارقىن دالەلى بولماق. مۇنداي ەرەكشە شارا ىنتىماقتاستىقتى دامىتۋعا، بەيبىتشىلىك پەن تاتۋ كورشىلىك يدەيالارىن ىلگەرىلەتۋگە ىقپال ەتەرىنە سەنىمدىمىن، – دەپ اتاپ ءوتتى ول.
Band Marathon دەگەنىمىز قاتىسۋشى توپتاردىڭ 20 مينۋتتىق قويىلىمدارى. ازەربايجاندىق مۋزىكانتتار كورەرمەندەرگە كومپوزيتور ۋزەير گادجيبەيليدىڭ «دجانگي»، ەمين سابيتوگلۋدىڭ «ينجا بەلليم»، الەكپەر تاگييەۆتىڭ «سەن گەلمەز ولدۋن» جانە ءبىر كەزدەرى اتى اڭىزعا اينالعان ءمۇسىلىم ماگومايەۆ ورىنداعان «جالىندى ولكە» اندەرىن تارتۋ ەتتى.
جۇڭگو مۋزىكانتتارى اۆتورى چجەن ليۋيچەننىڭ «جۇڭگو حالىق-ازاتتىق ارمياسىنىڭ مارشى»، شۋ يۋنگاننىڭ «ات جارىسى»، ۆان حەشەننىڭ «سينحاي-تيبەت تاۋلى ايماعى»، چەن ءسياننىڭ «ابا بيكەش»، لي چان وڭدەگەن «جاستار ءبيى»، ۆان ءسيننىڭ «وتانعا ماداق»، لي سيۋيحاونىڭ «بولاتتاي بەرىك بولىمدەر مارشى» مەن «اليشاننان كەلگەن قىز»، گو سىدا وڭدەگەن «دۋدار مەن ماريا» تۋىندىلارىن ورىندادى.
ءۇندىستاننىڭ اسكەري-اۋە كۇشتەرىنىڭ وركەسترى تىڭداۋشىلاردى «Renaissance» Wg Cdr G Jayachandran VSM، «Bombay 1980» Sgt D Mridha، «Dancing Queen» ABBA، «Imagination» Sgt Suneesh Thomas، «Mexican Shuffle» Bert Kaempfert، «Duniya me» Sgt D Mridha جانە «Jai Ho» Sgt NT Singh شىعارماشىلىعىمەن كەلۋشىلەردى قۋانتتى.
جاپون اسكەري وركەسترى استانالىقتارعا ارناپ Naruto Main Theme، Obatala، Hamabe no Uta (Song of the Seashore) جانە Festal Scenes اۋەندەرىن ورىندادى.
Tsuna a wakens، La camisa negra، كيلپيللاما، Delilah، Summertime، حورازيمچا جانە Go down Moses كومپوزيسيالارىن ورىنداعان وزبەكستاننىڭ ورتالىق اسكەري وركەسترى اسپاپتارىنىڭ اۋەزدى ۇنىمەن جۇرتتى تامساندىردى.
رەسەي فەدەراسياسى باتىس اسكەري وكرۋگىنىڭ 23ء-شى اسكەري وركەسترىنىڭ رەپەرتۋارىنداعى كوپتەگەن اۋەندەر تىڭداۋشىلارعا تانىس. مۋزىكالىق ۇجىم «لەنينگراد مارشى»، «ورىس كومپوزيتورلارىنىڭ تاقىرىپتارىنا ارنالعان پوپۋرري»، «قىزمەتتىك رومان» كينوفيلمىندەگى «ۋترو»، «ادام امفيبيا» كينوفيلمىندەگى «پەسەنكا و مورسكوم دياۆولە»، «سينيايا ۆەچنوست»، «چەرتوۆو كولەسو» مەن سەيدوللا بايتەرەكوۆتىڭ «ءاليا» اندەرىن ورىندادى.
تۇرىك اسكەري وركەسترى «مەحتەران» كەماني تاتيوستىڭ «سۋزيناك پەشريەۆي»، لەيلا سازدىڭ «نەشيدە-ي زافەر مارشى»، فارۋك گيۋرتۋندجدىڭ «مەحتەر ۆۋرۋيور»، يسمايل حاككى بەيدىڭ «مەحتەرحانە-ي حاكاني مارشى»، ءالي رىزا بەيدىڭ «وردۋ مارشى»، «حيۋدجۋم مارشى»، «ەستەرگون قالاسى» جانە «گەنچ وسمان» اۋەندەرىن ورىنداپ، كورەرمەندەردى ءتانتى ەتتى.
بۇل كۇنى فەستيۆالگە قاتىسۋشىلار ەلدەردى ءوزارا بىرىكتىرەتىن جانە نىعايتاتىن سازدى اۋەن تىلىندە سويلەدى. ونەردە ۇلت جوقتىعىن كورسەتە وتىرىپ، الەمنىڭ بىرەگەي اسكەري وركەسترلەرى ۇلتتىق، شىعارماشىلىق جانە ارميا داستۇرلەرىنىڭ الۋان تۇرلىلىگىن كورەرمەندەرگە پاش ەتتى. استانالىقتار دا وركەسترلەردىڭ قويىلىمدارىنا قوشەمەت كورسەتىپ، كوتەرىڭكى كوڭىل-كۇيىن جاسىرا المادى.
