ءتۋرنيردىڭ جۇلدە قورى 40 ميلليون تەڭگە.
دينارا ءسادۋاقاسوۆا استانادا حالىقارالىق شاحمات فەستيۆالىن وتكىزەدى، دەپ حابارلايدى Almaty-akshamy.kz
11 شىلدە مەن 19 شىلدە ارالىعىندا ەلوردادا استانانىڭ 25 جىلدىعىنا ارنالعان "استانا جۇلدىزدارى" حالىقارالىق شاحمات فەستيۆالى وتەدى. جارىستى قازاقستاندىق سپورتشى، الەم چەمپيوناتتارىنىڭ جەڭىمپازى دينارا ءسادۋاقاسوۆا باسقاراتىن شاحمات اكادەمياسى ۇيىمداستىرادى.
ءتۋرنيردىڭ ماقساتى – قازاقستاندا شاحماتتى سپورت ءتۇرى رەتىندە تانىمال ەتۋ جانە دامىتۋ، سالاۋاتتى ءومىر سالتىن ناسيحاتتاۋ، سونداي-اق جاس سپورتشىلاردىڭ شەبەرلىگىن ارتتىرۋ، جاس تالانتتاردى ىزدەۋ. فەستيۆال كەزىندە ۇيىمداستىرىلاتىن تۋرنيرلەرگە قازاقستانعا الەمنىڭ 16 ەلىنەن 800-دەن استام ادام شاحماتشى كەلەدى دەپ كۇتىلۋدە. جۇلدە قورى رەكوردتىق سوما – 40 ميلليون تەڭگەنى قۇرايدى.
فەستيۆال اياسىندا ءتورت تۋرنير وتەدى: ەرلەر مەن ايەلدەر اراسىنداعى قازاقستان رەسپۋبليكاسى كۋبوگىنىڭ كەزەڭى، اۋەسقويلار، بالالار اراسىندا جانە بليستەن تۋرنير. جارىسقا كەلەتىن بالالاردىڭ اراسىندا ەكىباستۇز بالالار ءۇيىنىڭ تاربيەلەنۋشىلەرى دە بولادى. سونىمەن قاتار، "فيدە ۇيىمداستىرۋشىسى" (FIDE – ۇلتتىق فەدەراسيالاردى بىرىكتىرەتىن حالىقارالىق شاحمات فەدەراسياسى) اتاعىن الۋ ءۇشىن سەمينار ۇيىمداستىرىلادى.