ەلوردانىڭ ەسىل اۋدانىندا ورنالاسقان ەكى قاباتتى ءدامحانالاردىڭ بىرىندە ءورت شىقتى. توتەنشە جاعدايلار مينيسترلىگى ماماندارىنىڭ جەدەل ارەكەتىنىڭ ارقاسىندا ءتىلسىز جاۋ عيماراتقا تولىق جايىلماي، دەر كەزىندە اۋىزدىقتالدى، دەپ حابارلايدى Aqshamnews.kz ءتىلشىسى.
الدىن الا مالىمەتكە سايكەس، ءورت تۋرالى حابارلاما دەمالىس كۇنى كەزەكشى بولىمگە تۇسكەن. وقيعا ەلۋباي تايبەكوۆ كوشەسى بويىنداعى قوعامدىق تاماقتانۋ ورنىندا بولعان. قۇتقارۋشىلار جەتكەن ساتتە عيماراتتى قويۋ ءتۇتىن باسىپ، وت ءبىرىنشى جانە ەكىنشى قاباتتاعى جيھازداردى شارپىعان. ءورتتىڭ جالپى اۋماعى 80 شارشى مەتردى قۇراعان.
ءورت ءسوندىرۋ بولىمشەلەرىنىڭ ۇيلەسىمدى جۇمىسىنىڭ ناتيجەسىندە جالىننىڭ نىساننىڭ باسقا بولىكتەرىنە تارالۋىنا جول بەرىلمەدى. قازا تاپقاندار مەن جاراقات العاندار جوق، عيماراتتىڭ نەگىزگى قۇرىلىمدارى امان قالعان. ءقازىر ءورتتىڭ شىعۋ سەبەپتەرى مەن ماتەريالدىق شىعىن كولەمى انىقتالىپ جاتىر.