اقمولا وبلىسىنىڭ قوياندى اۋىلىندا دۇكەن اۋماعىنان شىقپاق بولعان «گازەل» اۆتوكولىگى ەكى ءجاسوسپىرىمدى قاعىپ كەتتى، دەپ حابارلايدى Aqshamnews.kz ءتىلشىسى.
الدىن الا مالىمەت بويىنشا، وقيعا 31 قاڭتاردا بولعان: جۇرگىزۋشى كولىكتى ارتقا جۇرگىزۋ كەزىندە جاياۋ جۇرگىنشىلەردى بايقاماي قالعان. ناتيجەسىندە 13 جانە 16 جاستاعى مەكتەپ وقۋشىلارى اۋرۋحاناعا جەتكىزىلىپ، دارىگەرلىك تەكسەرۋدەن ءوتتى. دارىگەرلەر بالالاردىڭ اۋىر جاراقات الماعانىن انىقتادى.
اقمولا وبلىستىق پوليسيا دەپارتامەنتى بۇل دەرەك بويىنشا تۇسىنىكتەمە بەرىپ، وقيعاعا قاتىستى قاجەتتى ءىس-شارالار جۇرگىزىلىپ جاتقانىن مالىمدەدى. ءقازىر جۇرگىزۋشىنىڭ ارەكەتىنە قۇقىقتىق باعا بەرىلىپ، جاعدايدىڭ بارلىق ءمان-جايى ناقتىلانۋدا.