23 قاڭتار ساعات 00:19 شاماسىندا ەلوردالىق تجد داعدارىس جاعدايلارى باسقارماسىنا جەرگىلىكتى تۇرعىنداردان جەر سىلكىنىسىنىڭ سەزىلگەنى تۋرالى 30-دان استام قوڭىراۋ ءتۇستى.
استانانىڭ توتەنشە جاعدايلار دەپارتمەنتى بۇل ماسەلەگە قاتىستى تۇسىنىكتەمە بەردى، دەپ حابارلايدى Almaty-akshamy.kz.
«حابارلامالار تۇسكەن مەكەنجايلار بويىنشا جەدەل-قۇتقارۋ بولىمشەلەرى جىبەرىلدى، ولار عيماراتتار مەن قۇرىلىستارعا تەكسەرۋ جۇرگىزىپ، جەر سىلكىنىسى فاكتىلەرى راستالماعانىن ايتتى. استانادا جەر سىلكىنىسى بولعان جوق، بۇل الماتىدا بولعان جەر سىلكىنىسىنىڭ سالدارى بولدى. قازىرگى ۋاقىتتا 24-51-47 جانە 24-51-71 تەلەفوندارى بويىنشا جەدەل جەلى جۇمىس ىستەپ تۇر»، دەلىنگەن حابارلامادا.
عىلىم جانە جوعارى ءبىلىم ءمينيسترى ساياسات نۇربەك ۇكىمەت وتىرىسىنان كەيىنگى بريفينگ بارىسىندا ەلوردالىقتاردى سابىرعا شاقىرىپ، ۋايىمداۋعا ەش سەبەپ جوق ەكەنىن ايتتى.
«جەر استى ءدۇمپۋى، سەيسميكالىق تولقىن ايتارلىقتاي قاتتى بولدى. ريحتەر شكالاسى بويىنشا سىلكىنىس 6،5-7 باللدى قۇرادى. جەر استى ءدۋمپۋى ورتالىق قازاقستانعا دا اسەر ەتتى. ول وڭتۇستىكتەن سولتۇستىككە باعىتتالدى. سوندىقتان ءالسىز بولسا دا ونى استانا تۇرعىندارى دا سەزىندى. استانا تۇران پلاتفورماسىندا ورنالاسقانىن ەسكە سالا كەتكەنىم ورىندى بولار. بۇل وتە تۇراقتى، ەسكى پلاتفورما. سوندىقتان بۇل جاي افتەرشوك بولدى. ۋايىمداۋعا سەبەپ جوق»، دەدى ساياسات نۇربەك.