ولار سالاداعى ءبىرقاتار ماسەلەلەردى كوتەردى.
قازاقستانىڭ ەكولوگيا، گەولوگيا جانە تابيعي رەسۋرستار مينيسترلىگىندە بالىقشىلاردىڭ جينالىسى ءوتتى، دەپ حابارلايدى Almaty-akshamy.kz.
«جيىندا رەسپۋبليكانىڭ وڭىرلەرىنەن كەلگەن بالىقشىلار سالاداعى ءبىرقاتار ماسەلەلەردى كوتەردى. ماسەلەن، كاسپيي بالىقشىلارى بالىق اۋلاۋ اۋىنىڭ ءجىپ ديامەترى 0،3 مم-دەن باستالاتىن مونوجىپتەر جانە مونوتالشىقتان جاسالعان اۋلاردى پايدالانۋ مۇمكىندىگىن قاراستىرۋدى جەتكىزدى»، - دەلىنگەن مينيسترلىكتىڭ باسپا ءسوز قىزمەتىنىڭ حابارلاماسىندا.
بۇل ماسەلەگە قاتىستى مينيستر وسى جىلدىڭ مامىر ايىنىڭ سوڭىنا دەيىن شەشىم قابىلدانۋى مۇمكىندىگىن جەتكىزدى.
«سالالىق عىلىمي ۇيىم ءساۋىر-مامىر ايلارىندا زەرتتەۋلەر جۇرگىزەدى، ولاردىڭ ناتيجەلەرى بويىنشا مامىر ايىنىڭ سوڭىندا شەشىم قابىلدايمىز. ەگەر تىكەلەي تەرىس اسەرى بولماعان جاعدايدا، اتالعان اۋلاردى ءىرى سۋ ايدىندارىندا 2 جىلعا دەيىن پيلوتتىق رەجيمدە پايدالانۋعا 3-4 اي ىشىندە زاڭناماعا ءتيىستى وزگەرىستەر ەنگىزۋ ارقىلى رۇقسات بەرۋگە بولادى»-، دەدى ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ.
سونىمەن قاتار، جيىندا بالقاش كولىندە كوكسەركە اۋلاۋ ءليميتىن ارتتىرۋ ماسەلەسى كوتەرىلدى. بۇعان قاتىستى مينيستر كوكسەركە اۋلاۋ ءليميتىنىڭ ۇلعايۋىن 2023 جىلعى ماۋسىمدا بالىق اۋلاۋ ءليميتىن انىقتاۋ ادىستەمەسىنە وزگەرىستەر ەنگىزۋدى ەسكەرە وتىرىپ، قاراستىرۋعا بولاتىنىن ايتتى.
بۇدان بولەك، كەڭەستە كاسىپشىلىك بالىق اۋلاۋدى جۇزەگە اسىرۋ ءۇشىن سۋ ايدىنىنا قول جەتكىزۋ جانە جاعالاۋ ايماعىندا تۇراتىن جەكە تۇلعالاردىڭ بالىق اۋلاۋعا رۇقسات الۋى كوتەرىلدى. ءمينيستردىڭ سوزىنشە، اتالعان ماسەلەنى مينيسترلىك جاعالاۋداعى تۇرعىندارعا جەكە رۇقسات الۋ ارقىلى بالىق اۋلاۋعا مۇمكىندىك بەرەتىن ماسەلەنى قاراستىرۋدا. سونداي-اق، بەكىتىلگەن ۋچاسكەلەردە عانا ەمەس، رەزەرۆتىك قوردا دا بالىق اۋلاۋدى جۇزەگە اسىرۋ ماسەلەسى كۇن تارتىبىندە بولدى.
«ءبىراق بۇل ماسەلەلەر وسى سالادا قىزمەت ەتەتىن ءىرى بيزنەستىڭ پىكىرىن ەسكەرە وتىرىپ، كەڭ تالقىلاۋدى قاجەت ەتەدى. بۇل ماسەلەنى شەشۋ ءۇشىن، ەڭ الدىمەن، «جانۋارلار دۇنيەسىن قورعاۋ، ءوسىمىن مولايتۋ جانە پايدالانۋ تۋرالى» زاڭىنا وزگەرىستەر ەنگىزۋ قاجەت. زاڭداردى قابىلداۋدىڭ بەلگىلەنگەن ءتارتىبى شامامەن 1 جىلدى تالاپ ەتەتىنىن بىردەن اتاپ وتكىم كەلەدى. بۇدان ءارى رۇقسات بەرۋ ەرەجەلەرى، كۆوتالاردى ءبولۋ ەرەجەلەرى، بالىق اۋلاۋ ەرەجەلەرى سياقتى ءبىرقاتار بۇيرىقتارعا وزگەرىستەر ەنگىزۋ كەرەك. الايدا، ءبىز سىزدەردىڭ كوتەرىپ وتىرعان ماسەلەلەرىڭىزدى شەشۋ ءۇشىن بارلىق قاجەتتى شارالاردى قابىلدايمىز»، - دەدى سەرىكقالي برەكەشيەۆ.
جالپى، بەس ساعاتقا سوزىلعان جينالىستا بالىق شارۋاشىلىعىنا قاتىستى كوپتەگەن ماسەلەلەر كوتەرىلدى. جينالىس قورىتىندىسى بويىنشا مينيستر جاۋاپتى ۆەدومستۆوعا ءبىرقاتار ناقتى تاپسىرمالار بەردى.