ەلوردانىڭ 25 جىلدىعىنا وراي مادەنيەتتەر مەن حالىقتاردى بىرىكتىرۋدىڭ بىرەگەي قۇرالى اسكەري وركەسترلەردىڭ I حالىقارالىق «استانا – مادەنيەت كەرۋەنى» اسكەري-مۋزىكالىق فەستيۆالى وتەدى، دەپ حابارلايدى almaty-akshamy.kz
قالالىق اكىمدىكتىڭ قولداۋىمەن قورعانىس مينيسترلىگى ازەربايجان، ءۇندىستان، قازاقستان، جۇڭگو، رەسەي، تۇركيا، وزبەكستان جانە جاپونيا قارۋلى كۇشتەرى مۋزىكالىق ۇجىمدارىنىڭ قاتىسۋىمەن قازاقستاندىقتارعا ەرەكشە سىيلىق دايىنداۋدا.
فەستيۆال اياسىندا ەلورداعا بەس جۇزگە جۋىق مۋزىكانت جينالماق. ولاردىڭ رەپەرتۋارى مارش، ەسترادا، دجاز جانە تانىمال كلاسسيكالىق تۋىندىلارعا باي. ءار كوماندانىڭ وزىندىك ءستيلى، ءتۇسى جانە مۋزىكالىق قولتاڭباسى بار.
مۇنداي كولەمدەگى ءىس-شارانى وتكىزۋ ۇجىمداردىڭ شىعارماشىلىق وسۋىنە، وركەسترلىك مادەنيەتتى دامىتۋعا جانە دوستىق بايلانىستاردى نىعايتۋعا ىقپال ەتەتىن بولادى.
ءىس-شارالار 6 شىلدە كۇنى باستالادى. 19.30-دا ەسىل وزەنىنىڭ جاعاسىنداعى جازعى امفيتەاتر ساحناسىندا وركەسترلەردىڭ قاتىسۋىمەن Band Marathon وتەدى.
كەلەسى كۇنى ساعات 20.00-دە مۋزىكالىق ۇجىمداردىڭ قويىلىمدارى ورتالىق ساياباقتا، "بايتەرەك" مونۋمەنتى مەن "حان شاتىر"ساۋدا-ويىن-ساۋىق ورتالىعىندا وتەدى.
فەستيۆال 8 شىلدەدە اياقتالادى. "بارىس ارەنا" مۇز سارايىندا ۇلكەن گالا-كونسەرت وتەدى. ساعات 12.00-دە باستالاتىن كونسەرتتە كورەرمەندەر وركەسترلەر دەفيلەسىمەن قويىلعان قىزىقتى مۋزىكالىق-تەاترلاندىرىلعان قويىلىمنىڭ كۋاسى بولادى.