«استانا بالەت» تەاترىنىڭ شۆەيسارياعا گاسترولدىك ساپارى باستالدى

بۇگىن شۆەيساريادا ق ر مادەنيەت جانە اقپارات مينيسترلىگىنىڭ قولداۋىمەن ۇيىمداستىرىلعان «استانا بالەت» تەاترىنىڭ گاسترولدەرى باستالدى.

استانالىق ۇجىم جەنيەۆانىڭ Batiment des Forces Motrices مادەنيەت ورتالىعىندا ءۇش كۇن بويى ۇلتتىق جانە زاماناۋي حورەوگرافيانىڭ ۇزدىك تۋىندىلارى  ا.الونسونىڭ «كارمەن-سيۋيتا» بالەتى، «تاعدىر بۇلتارىستارى» اۆتورلىق سپەكتاكلى مەن «ۇلى دالا مۇراسى» گالا-كونسەرتىن كورەرمەن نازارىنا ۇسىنادى، دەپ حابارلايدى اlmaty-akshamy.kz.

«مەنىڭ ويىمشا، كەز-كەلگەن گاسترول – تاجىريبە الماسۋ، مادەني ءداستۇردى پاش ەتۋ. وسى تۇرعىدان العاندا جەنيەۆا ءبىز ءۇشىن جاڭا قالا. ءبىز كورسەتەتىن سپەكتاكلدەر، ءسوز جوق، وزىق قويىلىمدار. جەنيەۆا كورەرمەنى دە بۇل تۋىندىلاردى زور ىلتيپاتپەن قابىل الارىنا ءۇمىتتىمىز»، - دەگەن ويىمەن تەاتر ديرەكتورى الەكساندر سوۆوستيانوۆ ءبولىستى.

كورەرمەنگە جورج بيزە-راديون ششەدرين مۋزىكاسىنا ا.الونسو قويعان «كارمەن-سيۋيتا» بالەتى كورسەتىلەدى. بۇل – حح عاسىر بالەت ونەرىنىڭ وزىق ۇلگىسى. حورەوگرافيالىق ونەردىڭ جانكۇيەرلەرى «استانا بالەت» تەاترىنىڭ باس بالەتمەيستەرى مۋكارام ابۋباحرييەۆا كارينا ابدۋللينانىڭ مۋزىكاسىنا قويعان «تاعدىر بۇلتارىستارى» ميستيكالىق سپەكتاكلىن تاماشالاي الادى.

سونداي-اق، ونەر سۇيەر قاۋىمعا قازاقستاننىڭ ەڭبەك سىڭىرگەن قايراتكەرلەرى ايگۇل ءتاتي مەن مۋكارام ابۋباحرييەۆا تۋىندىلارىنان قۇرالعان «ۇلى دالا مۇراسى» گالا-كونسەرتى كورسەتىلەدى. ۇلتتىق بولمىسىمىزدى بي تىلىمەن جەتكىزەتىن ەتنوگرافيالىق جانە بەينەلىك ناقىشقا باي تۋىندى تەاترىمىزدى ايگىلەپ تۇرعان دۇنيەگە اينالىپ، ەۋروپا مەن امەريكانىڭ تالاي كورەرمەنىن تامساندىرعان.