2023 جىلدىڭ 21 اقپان كۇنى ساعات 15:00-دە الماتى قالاسىنىڭ تاريح مۇراجايىندا سۋرەتشى اسەل سابىرجان قىزىنىڭ «اسسول. تۇلعالار – شابىت باستاۋى...» كورمەسىنىڭ اشىلۋى وتەدى.
كورمە تيۋركسويدىڭ الماتى قالاسىنداعى كەڭسەسىمەن بىرلەسە ۇيىمداستىرىلىپ، ۇيىمنىڭ 30 جىلدىعى اياسىندا وتكىزىلۋدە، دەپ حابارلايدى Almaty-akshamy.kz.
اسەل سابىرجان قىزى (اسسول) – سۋرەتشى، ستانوكتىق كەسكىندەمەنىڭ شەبەرى، ونەرتانۋ عىلىمىنىڭ ماگيسترى. ول بەس جاسىنان باستاپ سۋرەت سالۋمەن اينالىسادى. بويجەتكەننىڭ الەۋمەتتىك جەلىدەگى پاراقشاسىنداعى كورسەتكەن ونەرىن ەشقانداي ونەر مەكەمەلەرىندە وقىتپايدى، مۇنىڭ ءبارى ۇزاق تاجىريبە مەن قاجىرلى ەڭبەك.
اسەل ءوز جۇمىسىندا سيمۆولدىق گرافيكا ءادىسىن پايدالانادى. بۇل شاعىن قۇرامداس بولىكتەردەن قۇرالعان، ادامنىڭ پورترەتىڭ سالاتىن كەزدەگى ءادىس بولىپ تابىلادى. بۇل ءادىستىڭ ءبىر مىسالى – اسەلدىڭ «كوزىمنىڭ قاراسى» ءانىنىڭ سوزدەرىن پايدالانىپ سالعان ابايدىڭ پورترەتى. الماتىلىق سۋرەتشىنىڭ قايتالانباس قابىلەتتەرىنىڭ ءبىرى – ەكى قولمەن، ءارى ەكى اياقپەن قاتار سۋرەت سالا ءبىلۋى. وسىلايشا ول ءاربىر قازاقستان ازاماتىنا بەلگىلى تۇلعالاردىڭ التى رەاليستىك پورترەتىن سالدى.
نەيروتەراپيەۆت بيلل سكوتتىڭ ايتۋىنشا، اسەلدىڭ سۋرەت سالۋ بارىسىندا مي بەلسەندىلىگى شامادان تىس ارتادى.
اسەل شىعارماشىلىق كوزقاراس پەن قازاق ونەرىن حالىقارالىق دەڭگەيدە تانىتقانى ءۇشىن، قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ جەكە ماراپاتىنا يە بولدى.
سۋرەتشى الداعى ۋاقىتتا ءوزىنىڭ مەكتەبىن اشۋدى جوسپارلاپ وتىر. كورمە الماتى قالاسىنىڭ مادەني ومىرىندەگى ايتۋلى وقيعالاردىڭ ءبىرى بولماق.
كورمە 2023 جىلدىڭ 2 ناۋرىزىنا دەيىن جالعاسادى.