بۇگىن داڭقتى ۇشقىش، ەكى مارتە كەڭەس وداعىنىڭ باتىرى تالعات بيگەلدينوۆتىڭ تۋعانىنا 99 جىل تولدى.
7 جىل بۇرىن ومىردەن وتكەن ۇشقىشتىڭ قۇرمەتىنە اسكەري قىزمەتشىلەر نۇر-سۇلتان قالاسىنداعى باتىردىڭ ەسكەرتكىشىنە گۇل شوقتارىن قويدى، دەپ حابارلايدى Almaty-akshamy.kz ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
وعان حالىق قاھارمانى، ارميا گەنەرالى مۇحتار التىنبايەۆ، اۋە قورعانىسى كۇشتەرىنىڭ باس قولباسشىسى، اۆياسيا گەنەرال-لەيتەنانتى نۇرلان ورمانبەتوۆ، قازاقستان اسكەري-اۋە كۇشتەرىنىڭ ارداگەرلەرى مەن وفيسەرلەرى قاتىستى.
«بۇگىن ءبىز تالعات جاقىپبەك ۇلىنىڭ ەرلىگىنە تاعزىم ەتىپ، قۇرمەت كورسەتۋ ءۇشىن جينالىپ وتىرمىز. لايىقتى ءىزباسارلاردى، تاۋەلسىز قازاقستاننىڭ اسكەري ۇشقىشتارىن، وتان قورعاۋشىلارىن دايارلايتىن اۋە قورعانىسى كۇشتەرىنىڭ اسكەري ينستيتۋتى باتىردىڭ ەسىمىن ماقتانىشپەن الىپ ءجۇر. ءبىزدىڭ جۇرەگىمىزدە داڭقتى باتىر تۋرالى جارقىن ەستەلىكتەر ماڭگى ساقتالادى. باتىردىڭ «وقىڭىز. ۇيرەنىڭىز. ءجان-تانى ساۋ مىقتى ازامات بولىڭىز. ءوزىڭىزدى قيىندىققا توزە بىلۋگە ۇيرەتىڭىز. كەز كەلگەن جاعدايدا، كەز كەلگەن قيىندىقتا رۋحى مىقتى ادام عانا جەڭىمپاز بولادى. اعا بۋىننىڭ جاۋىنگەرلىك داستۇرلەرىن، ەڭبەكقورلىعىن ۇستاناتىن ادال مۇراگەرى بولىڭىز» دەگەن وسيەتىن ءارقاشان ۇستانامىز»، – دەدى اۆياسيا گەنەرال-لەيتەنانتى نۇرلان ورمانبەتوۆ.
تالعات بيگەلدينوۆ بالاشوۆسكيي اۆياسيالىق ۋچيليششەسىنىڭ كۋرسانتىنان باستاپ ءبىرىنشى ۋكراينا مايدانى قۇرامىنداعى 144ء-شى گۆارديالىق اۆياسيالىق پولكتىڭ ەسكادريليا كومانديرىنە دەيىنگى ەڭبەك جولىنان ءجۇرىپ ءوتتى.
سوعىس كەزىندە ول يل-2 شابۋىلداۋشى ۇشاعىندا 305 رەت ۇشىپ، باتىرلىق، ۇشۋدا شەبەرلىك تانىتىپ، ەڭ جاۋاپتى تاپسىرمالاردى ءساتتى ورىندادى. تالعات بيگەلدينوۆ ەرلىگى ءۇشىن لەنين، قىزىل تۋ، الەكساندر نيەۆسكيي، قىزىل جۇلدىز، III دارەجەلى داڭق، I جانە II دارەجەلى وتان سوعىسى وردەندەرىمەن ناگرادتالدى، ەكى رەت كەڭەس وداعىنىڭ باتىرى اتاعىنا يە بولدى. سوعىستان كەيىنگى جىلدارى تالعات بيگەلدينوۆ اسكەري جانە ازاماتتىق اۆياسيادا قىزمەت ەتىپ، قوعامدىق جۇمىسپەن اينالىستى.
تالعات جاقىپبەك ۇلى بيگەلدينوۆ 2014 جىلعى 10 قاراشادا قايتىس بولدى.