سارباز ءوزىنىڭ ۋلترامارافونىن وتان قورعاۋشىلار كۇنىنە جانە جەڭىس كۇنىنە ارنايدى
قورعانىس مينيسترلىگى سپورت كوميتەتى – ورتالىق سپورت كلۋبىنىڭ اسكەري قىزمەتشىسى ەفرەيتور باۋىرجان ءابدىحايىم بالقاش قالاسىنىڭ ماڭىنداعى اقجال اۋىلى ماڭىنان ۋلترامارافوندى باستادى، دەپ حابارلايدى Almaty-akshamy.kz.
العان باعىتى اقجال – اقسۋ-ايۋلى – اقسۋ – قاراعاندى – وساكاروۆكا – استانا ەلدى مەكەندەرى. سپورتشىنىڭ ەسەبى بويىنشا ول وزىنە كۇنىنە ءجۇز شاقىرىم جۇگىرۋدى مىندەتتەپ وتىر.
ورتالىق سپورت كلۋبى كومەندانتتىق ۆزۆودىنىڭ اعا ساربازى باۋىرجان ءابدىحايىم ءوزىنىڭ ۋلترامارافونىن وتان قورعاۋشىلار كۇنىنە جانە جەڭىس كۇنىنە ارنايدى. التىنشى كۇنى ول ەلىمىزدىڭ باس قالاسى – استاناعا جەتەمىن دەپ وتىر.
اسكەري سپورتشى دەمەۋشىلەرگە، ونىڭ ىشىندە مارافوندى تاماقتاندىرۋدى جانە مەديسينالىق قولداۋدى ۇيىمداستىرعانى ءۇشىن «حان سۇلتان» سپورت كلۋبىنىڭ وكىلدەرىنە، قاشىقتىقتاعى قوزعالىس قاۋىپسىزدىگىن قامتاماسىز ەتەتىن اسكەري پوليسيا قىزمەتكەرلەرىنە ريزاشىلىعىن ءبىلدىردى.
– مارافون وڭاي بولماسى انىق. دەگەنمەن، مەنىڭ مىندەتىم – كۇشىمدى ەسەپپەن جۇمساپ، تاپسىرمانى ورىنداۋ. ەڭ باستىسى، ماعان سەنىم بىلدىرگەندەردىڭ، تالىمگەرلەر مەن ارىپتەستەردىڭ ءۇمىتىن اقتاۋعا تىرىسامىن، – دەدى سپورتشى.
اتالعان ۋلترامارافوندى قازاقستاندىق رەكوردتار كىتابىنىڭ وكىلدەرى تىركەيتىن بولادى.