ق ر قورعانىس مينيسترلىگى تاربيە جانە يدەولوگيالىق جۇمىستار دەپارتامەنتىنىڭ باستىعى ادىلەت پولكوۆنيگى تىلەۋحان باسقوجايەۆ اقتاۋ گارنيزونىنا بارىپ، ساربازدارمەن جانە كومانديرلەرمەن كەزدەستى، دەپ حابارلايدى almaty-akshamy.kz
تەڭىز جاياۋ اسكەرلەرى، اۋە شابۋىلىنا قارسى قورعانىس بريگادالارىنىڭ جانە ماتەريالدىق-تەحنيكالىق قامتاماسىز ەتۋ بازاسىنىڭ جەكە قۇرامىمەن كەزدەسۋدە ادىلەت پولكوۆنيگى تىلەۋحان باسقوجايەۆ 2024 وقۋ جىلىندا قارۋلى كۇشتەردىڭ الدىنا قويىلعان مىندەتتەردى ايتتى. سونىمەن قاتار، "ەگەمەن قازاقستان" رەسپۋبليكالىق گازەتىندە جاريالانعان ەل پرەزيدەنتىنىڭ سۇحباتىنداعى نەگىزگى تەزيستەرگە جەكە توقتالدى.
دەپارتامەنت باستىعى كەزدەسۋگە قاتىسۋشىلاردى اسكەري قىزمەتشىلەردىڭ الەۋمەتتىك پاكەتىندەگى وزگەرىستەر تۋرالى حاباردار ەتتى.
– سوڭعى ءۇش جىل ىشىندە لاۋازىمدىق جالاقىنى كەزەڭ-كەزەڭمەن ۇلعايتۋ جۇرگىزىلدى. بيىل قارۋلى كۇشتەردەگى قاتارداعى جانە سەرجانتتىق قۇرام لاۋازىمدارىنىڭ تاريفتىك ساناتتارى جانە اسكەري قىزمەتشىلەردىڭ اسكەري اتاعى بويىنشا جالاقىلارى 30%-عا وسەدى، – دەدى دەپارتامەنت باستىعى.
ول سونىمەن قاتار قورعانىس ۆەدومستۆوسىنىڭ مەرزىمدى قىزمەتتەگى ساربازدارىنا ارنالعان كرەديتتىك دەمالىستار، ال ارميادا قىزمەت اتقارعان ازاماتتارعا ءبىلىم بەرۋ جەڭىلدىكتەرىن بەرۋگە قاتىستى جوبالاردى ەگجەي-تەگجەيلى ءتۇسىندىرىپ بەردى.
كومانديرلەرمەن اڭگىمەلەسۋ بارىسىندا ادىلەت پولكوۆنيگى تىلەۋحان باسقوجايەۆ اسكەري ۇجىمداردا قولايلى مورالدىق-پسيحولوگيالىق احۋالدى ساقتاۋدىڭ ماڭىزدىلىعىنا نازار اۋداردى. ول وقۋ-جاۋىنگەرلىك تاپسىرمالاردى ءساتتى ورىنداۋ كوبىنە وسىعان بايلانىستى ەكەنىن اتاپ ءوتتى. كەزدەسۋدە اسكەري بولىمدەردى جاساقتاۋ، وفيسەرلەر مەن سەرجانتتاردى روتاسيالاۋ ماسەلەلەرى دە قوزعالدى.
شابۋىلداۋ باتالونىنىڭ شتاب باستىعى اعا لەيتەنانت جانىبەك ازامباي كەزدەسۋ بارىسىندا ماراپاتقا يە بولدى. جاۋىنگەرلىك جانە مەملەكەتتىك-قۇقىقتىق دايىندىقتاعى جەتىستىكتەرى ءۇشىن ادىلەت پولكوۆنيگى تىلەۋحان باسقوجايەۆ قورعانىس ءمينيسترىنىڭ اتىنان اسكەري قىزمەتشىگە قول ساعاتىن تابىس ەتتى.