قارۋلى كۇشتەردە قىسقى دالالىق كيىمنىڭ جاڭا ۇلگىلەرىنە كوشكەن جەكە قۇرامنىڭ ساپتىق بايقاۋلارى ءوتتى.
ەستەرىڭىزگە سالا كەتەيىك، اسكەري قىزمەتشىلەرگە ارنالعان ءبىرىڭعاي دالالىق كيىم نىسانىنا كوشۋ قاجەتتىلىگى 2023 جىلعى مامىردا وتكەن بۇكىلارميالىق كەڭەستە مالىمدەلگەن بولاتىن. ق ر پرەزيدەنتىنىڭ 2023 جىلعى 12 جەلتوقسانداعى جارلىعى شىققاننان كەيىن قويىلعان تاپسىرمالاردى ىسكە اسىرۋ باستالدى، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
قارۋلى كۇشتەر تىلى باستىعىنىڭ ورىنباسارى پولكوۆنيك اسەت ورازالين تۇسىندىرگەندەي، ەرەكشە كەزەڭدە باسقا اسكەرلەر مەن اسكەري قۇرالىمدار قارۋلى كۇشتەردىڭ باسقارۋىنا وتەدى. تيىسىنشە، بۇركەمەلەۋ فۋنكسياسىن ورىندايتىن جانە كليمات پەن ايماقتىڭ گەوگرافيالىق ەرەكشەلىكتەرىن ەسكەرەتىن دالالىق فورما دا ءبىرتۇتاس بولۋى كەرەك.
كيىم فورماسى 1999، 2006 جانە 2011 جىلدارى ايتارلىقتاي وزگەرىستەرگە ۇشىرادى. ءبىراق بارلىق كۇشتىك قۇرىلىمدار اسكەري قىزمەتشىلەرىنىڭ ءبىرىڭعاي ءستيلى مەن تۇسىنە كوشۋ العاش رەت جۇزەگە اسىرىلىپ وتىر.
MultiCam بوياۋىنا كوشۋ تۋرالى شەشىم باسقا ەلدەردىڭ تاجىريبەسىن زەردەلەگەننەن كەيىن قابىلداندى. ول وسىمدىكتەرگە، قالالىق عيماراتتار مەن قيراندىلارعا، ءشولدى جانە تاستى جەرلەردە ەرەكشە بۇركەمەلەۋ قاسيەتىنە يە.
كيىم ءپىشىنىنىڭ جاڭا ۇلگىلەرى جاقسارتىلعان فۋنكسيونالدىلىقپەن جانە جايلىلىقپەن ەرەكشەلەنەدى. مىسالى، جاعاسى اۋا-رايى قولايسىز بولعان كەزدە مويىندى جابادى. قالتا قۇجاتتارىن وڭاي ساقتاۋ ءۇشىن كەۋدە قالتالارى كولبەۋ ورنالاسقان جانە ۆەلكرو تاسپاسىنا بەكىتىلگەن. ايىرىم بەلگىلەرى دە وسى تاسپاعا بەكىتىلەدى جانە تىگۋدى قاجەت ەتپەيدى. ارتقى جاعىنداعى قوسىمشالار قوزعالىستى شەكتەمەيدى. كەڭ شالبار بەلبەۋى دەنەگە جاقسى سايكەس كەلەدى، سونىمەن قاتار فورمانى رەتتەۋگە ارنالعان قۇرىلعىلارى بار.
قىسقى كيىم فورماسىنا تۇبەگەيلى وزگەرىستەر ەنگىزىلدى. ماتانىڭ سۋعا، ايازعا جانە جەلگە ءتوزىمدى قاسيەتتەرى بار. قالىڭ شالبار جارتىلاي كومبينەزون تۇرىندە جاسالعان. سونداي-اق، توقىلعان قالپاق پەن جۇننەن جاسالعان شارف تا قاراستىرىلعان.
اسكەري قىزمەتشىلەردىڭ ءوتىنىشى بويىنشا ءىس جۇزىندە پايدالانىلماعان ماۋسىمدىق پلاشش كۋرتكاعا اۋىستىرىلدى. كۇندەلىكتى جەمپىردىڭ ورنىنا دالالىق جەمپىر بەرىلەدى. تابيعي ەرەكشەلىكتەرىنە سۇيەنە وتىرىپ، جازعى ەتىكتەردىڭ ءتۇسى قارا تۇستەن قۇم تۇسىنە وزگەردى. باسقارۋ ورگاندارىنىڭ اسكەري قىزمەتشىلەرى ءۇشىن قونىشى بيىك ەتىك تاكتيكالىق كروسسوۆكالارعا اۋىستىرىلدى.
يننوۆاسيانىڭ ەكونوميكالىق قۇرامداس بولىگى دە ماڭىزدى. ونى ىسكە اسىرۋ قىسقارتىلعان كيىم-كەشەك قۇنى ەسەبىنەن عانا جۇزەگە اسىرىلادى. جابدىقتاۋ نورمالارىن وڭتايلاندىرۋ اسكەرلەردىڭ جىل سايىنعى قاجەتتىلىگىن 140 ملن تەڭگەگە ازايتتى.
بۇل رەتتە قويمالارداعى بار قورلار، ونىڭ ىشىندە ەسكى ۇلگىدەگى دالالىق كيىم-كەشەك مەرزىمدى قىزمەت ساربازدارى، جىل سايىنعى جيىندارعا تارتىلاتىن اسكەري مىندەتتىلەر ءۇشىن جانە اسكەريلەندىرىلگەن كۇزەت قىزمەتكەرلەرى ءۇشىن جۇمىس كيىمى رەتىندە پايدالانىلاتىن بولادى. بۇل جىل سايىن وسىنداي كيىم-كەشەك ساتىپ الۋعا 400 ملن تەڭگەدەن استام قاراجاتتى ۇنەمدەۋگە مۇمكىندىك بەرەدى.
سونداي-اق، اسكەري كيىم-كەشەك مەملەكەتتىك قورعانىس تاپسىرىسى اياسىندا تەك وتاندىق كاسىپورىنداردا جاسالاتىنىن اتاپ وتكەن ءجون.