بىرەر كۇن بۇرىن وسكەمەن گارنيزونى 27943 اسكەري ءبولىمىنىڭ اسكەري قىزمەتشىسى كاپيتان راي ورازبەكوۆ جاساعان قازاقتىڭ اتاقتى قولباسشىسى قابانباي باتىردىڭ ءبيۋستى سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ اسكەري كافەدراسىنا تاپسىرىلدى، دەپ حابارلايدى almaty-akshamy.kz
راي ورازبەكوۆ – وسكەمەن گارنيزونىنداعى وقۋ-جاتتىعۋ پوليگونىنىڭ باستىعى. ول بوس ۋاقىتىندا شىعارماشىلىقپەن اينالىسادى.
راي شىعىس قازاقستان وبلىسىنىڭ زايسان قالاسىندا دۇنيەگە كەلگەن. سۋرەتشىنىڭ تالانتى مەكتەپ جىلدارىندا وياندى. قۇرلىق اسكەرلەرى اسكەري ينستيتۋتىنىڭ كۋرسانتى بولىپ ءجۇرىپ تە راي ءمۇسىن جاساۋدى تاستاعان جوق.
2019 جىلى راي ورازبەكوۆ گۆاردەيسك گارنيزونىنان وسكەمەن قالاسىنىڭ 27943 اسكەري بولىمىنە اۋىستى. جاڭا قىزمەت ورنىندا باسشىلىق ەسىمى اسكەري بولىمگە بەرىلگەن قازاق باتىرى قاسىم قايسەنوۆتىڭ ءبيۋستىن جاساۋدى ۇسىندى.
– بۇل مەنىڭ ومىرىمدەگى ەڭ قىزىقتى ءارى جاۋاپتى ساتتەردىڭ ءبىرى بولدى. ءبىر اپتا ىشىندە قاسىم قايسەنوۆتىڭ ەكى ءمۇسىنىن سومداپ شىقتىم. ادەتتە مۇنداي جۇمىسقا بىر-ەكى اي ۋاقىت كەتەدى، – دەدى راي ورازبەكوۆ.
ۇلى وتان سوعىسى باتىرىنىڭ ءبىر ءمۇسىنى گارنيزونداعى داڭقتى جاۋىنگەر اتىنداعى مۇراجايعا، ال ەكىنشىسى اسكەري ءبولىمنىڭ كىرەبەرىسىندەگى اللەياعا قويىلدى.
اۆتوردىڭ «اسكەري قىزمەتشىلەردىڭ وتباسى» دەگەن تاعى ءبىر مۇسىندىك كومپوزيسياسى وسكەمەن قالاسىنداعى اسكەري قالاشىق ساياباعىندا ورناتىلعان. مۇندا سەرۋەندەۋگە كەلەتىندەر ءۇشىن بۇل جەر وتباسىلىق ەستەلىك فوتوسۋرەتتەر تۇسىرۋگە كورىك بەرىپ تۇر.
راي ورازبەكوۆ ءۇشىن شىعارماشىلىق – اڭىزعا اينالعان تۇلعالارعا دەگەن كوزقاراسىن ەرەكشە تاسىلمەن بەرۋ مۇمكىندىگى. اسكەري قىزمەتكە جۇرەك قالاۋىمەن كەلگەن ول ءۇشىن وتان قورعاۋ جولىنداعى ميسسيا ءوزى سومداپ جۇرگەن باتىرلار بەينەسىنەن كورىنىس تاپقانداي.