اسكەري پسيحولوگتار كاسىبي دەڭگەيىن جەتىلدىرۋدە

ءىس-شاراعا قارۋلى كۇشتەردىڭ 200-دەن استام پسيحولوگى قاتىستى

ساعادات نۇرماعامبەتوۆ اتىنداعى قۇرلىق اسكەرلەرىنىڭ اسكەري ينستيتۋتىندا قارۋلى كۇشتەردىڭ پسيحولوگتارىمەن وقۋ-ادىستەمەلىك جيىنى ءوتتى، دەپ حابارلايدى Almaty-akshamy.kz قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.

اسكەري پسيحولوگيا – اسكەري قىزمەتشىلەردىڭ جاۋىنگەرلىك ءىس-قيمىلعا قاجەتتى ەرەكشەلىكتەرى مەن قاسيەتتەرىن قالىپتاستىرۋ مەن ساقتاۋدىڭ ماڭىزدى تەتىگى. قارۋلى كۇشتەردە باسقارۋ ورگاندارىندىڭ بولىمشەلەرىندە، اسكەري بولىمدەر مەن باتالوندارىندا پسيحولوگتاردى قامتيتىن پسيحولوگيالىق قىزمەت جۇمىس ىستەيدى.

جيىننىڭ باستى ماقساتى – قيىن جاعدايعا تاپ بولعان اسكەري قىزمەتشىلەرگە كومەك كورسەتۋدە پسيحولوگيالىق جۇمىستى ۇيىمداستىرۋدىڭ ءبىرىڭعاي ءتاسىلىن ازىرلەۋ. ءىس-شارا اسكەري پسيحولوگتاردى اسكەري احۋال فاكتورلارىنان تۋىنداعان جەكە قۇرام اراسىنداعى پسيحوگەندىك بۇزىلۋلارعا بايلانىستى جۇمىس ادىستەمەسىن وقىتۋعا باسا نازار اۋدارىلدى.

باس شتاب باستىعىنىڭ ورىنباسارى – تاربيە جانە يدەولوگيالىق جۇمىس دەپارتامەنتىنىڭ باستىعى گەنەرال-مايور سەرىك بورامبايەۆتىڭ باسشىلىعىمەن وتكەن ءىس-شاراعا قارۋلى كۇشتەردىڭ 200-دەن استام پسيحولوگى قاتىستى.

الماتى قالاسىنىڭ جەتەكشى وقۋ ورىندارى مەن جەرگىلىكتى اتقارۋشى ورگاندارىنان شاقىرىلعان ماماندار شەبەرلىك ساباقتارىن وتكىزدى.

«قاتىسۋشىلار تاجىريبە الماسىپ، ترەنينگتەر بارىسىندا سترەسستىك جاعدايلارداعى پسيحولوگيالىق ءوزىن-وزى رەتتەۋ تاسىلدەرىنە، جاۋىنگەرلىك جاعدايلاردا پسيحولوگيالىق كومەك كورسەتۋگە جانە اسكەري قىزمەتشىلەردى پسيحولوگيالىق وڭالتۋ جۇمىسىنا ماشىقتاندى»،-دەلىنگەن حابارلامادا.

جيىن بارىسىندا قارۋلى كۇشتەر قاتارىنا اسكەرگە شاقىرۋ كەزىندە ازاماتتاردى ساپالى ىرىكتەۋ ماسەلەلەرىن تالقىلاۋعا دا ەرەكشە نازار اۋدارىلدى.

اتالعان شارا ەل پرەزيدەنتى – قارۋلى كۇشتەردىڭ جوعارعى باس قولباسشىسى قاسىم-جومارت توقايەۆتىڭ اسكەري قىزمەتشىلەردىڭ مورالدىق رۋحىن ساقتاۋدى قامتاماسىز ەتۋ، مەرزىمدى اسكەري قىزمەتتىڭ بەدەلى مەن قىزىعۋشىلىعىن ارتتىرۋ تاپسىرمالارىن ىسكە اسىرۋ اياسىندا ءوتتى. جۇكتەلگەن مىندەتتەردى شەشۋدە اسكەري پسيحولوگتاردىڭ اتقاراتىن ءرولى ماڭىزدى.